Zyra e kryeministrit izraelit, Benjamin Netanyahu, thotë se është arritur pajtueshmëri për një “marrëveshje për lirimin e pengjeve”.
Netanyahu kishte shtyrë një votim të kabinetit për ta miratuar marrëveshjen e armëpushimit në Gaza, që pritej të bëhej të enjten, duke e akuzuar Hamasin se kishte kërkuar ndryshime të minutës së fundit në pakt, raporton televizioni BBC.
Të premten në mëngjes, zyra e tij tha se Netanyahu ishte informuar nga ekipi negociues se ishin arritur marrëveshje për paktin.
Ai e ka urdhëruar kabinetin politik dhe të sigurisë që të mblidhet më vonë të premten dhe Qeveria “do të tubohet për ta miratuar marrëveshjen”, tha zyra e Netanyahut, duke shtuar se për këtë zhvillim janë njoftuar edhe familjet e pengjeve.
Mediat izraelite raportojnë se përfaqësues të Izraelit, Hamasit, Shteteve të Bashkuara dhe Katarit e kanë nënshkruar zyrtarisht marrëveshjen në Doha.
Marrëveshja për armëpushim u njoftua së pari të mërkurën nga ShBA-ja dhe Katari, që kanë qenë në rolin e ndërmjetësuesve.
Kryeministri i Katarit, Sheikh Mohammed bin Abdul Rahman Al Thani, tha se marrëveshja do të hyjë në fuqi të dielën, në pritje të miratimit nga kabineti izraelit.
