Presidenti i Ukrainës, Volodymyr Zelensky, ka thënë se sulmi ndaj digës në Nova Kakhovka tregon se trupat ruse “duhet të dëbohen nga çdo kënd i tokës ukrainase”, raporton televizioni BBC.

Duke shkruar në rrjetin “Telegram”, presidenti ukrainas tha: “Terroristët nuk do të mund ta ndalin Ukrainën me ujë, raketa ose me asgjë tjetër.”

“Është vetëm fitorja e Ukrainës ajo që do ta kthejë sigurinë dhe kjo fitore do të vijë”– shtoi ai.

Në anën tjetër, Rusia ka mohuar se e ka kryer sulmin ndaj digës.

Zelensky tha se të gjitha shërbimet vazhdojnë të punojnë pavarësisht nga dëmi dhe u bëri thirrje të gjithëve që po e lexonin shkrimin e tij që t’i shpërndajnë vetëm informatat zyrtare dhe të vërtetuara.

Ndërkohë presidenti i Këshillit Evropian, Charles Michel, tha se është i shokuar nga sulmi i pashembullt ndaj digës në rajonin Kherson të Ukrainës.

“Shkatërrimi i infrastrukturës civile cilësohet qartazi si krim lufte”– shkroi ai në rrjetin “Twitter”.

Zyrtari i lartë i BE-së e fajësoi Rusinë për këtë sulm, duke thënë se Këshilli Evropian do ta mbajë Moskën përgjegjëse për veprimet e saj.

Ai shtoi se do të propozojë më shumë asistencë për zonat e vërshuara nga uji gjatë samitit të ardhshëm të udhëheqësve të vendeve të BE-së në Bruksel