Presidenti i Serbisë, Aleksandar Vuçiq ka deklaruar në një konferencë për media në Beograd se dihej që në fillim se Kosova do të ketë shumicën e votave në Komitetin e Ministrave të Këshillit të Evropës për fillimin e procedurës së anëtarësimit.

Ai tregon se paraprakisht kishte biseduar me Viktor Orbanin duke e falënderuar për votën kundër të Hungarisë, raporton N1.

“Vendimi i Hungarisë ishte i papritur dhe i jam pafundësisht mirënjohës Viktor Orbanit. E pyeta të shtunën nëse mund ta kuptonte qëndrimin e Serbisë, duke pritur që ata të abstenojnë dhe ata treguan se janë miqtë më të mëdhenj të Serbisë, votuan kundër”, tha ai.

Vuçiq falënderoi po ashtu edhe Spanjën, Qipron, Rumaninë, Azerbajxhanin dhe Gjeorgjinë për votën kundër, duke theksuar se këto vende janë miq të Serbisë “para gjithë këtyre të tjerave”.

Presidenti serb foli edhe për masat që Serbia mund të marrë pas votimit në Këshillin e Evropës.

Vuçiq tha se se ndryshim do të ketë, transmeton Gazeta Online Reporteri.net.

“Ne nuk duhet të presim dorën apo këmbën tonë dhe të ndërpresim marrëdhëniet me të gjithë botën, por ajo që duhet të ndryshojmë është që të respektojmë më shumë ata që janë miqësorë me ne, në mënyrë që atë që e kanë bërë për ne të mos e harrojmë menjëherë pasnesër”, ka thënë Vuçiq.

Ai shtoi se Serbia nuk ka një strategji koherente të politikës së jashtme, por paralajmëroi se ajo do të hartohet dhe se do të kujdeset që Serbia të mos shkojë përtej kufijve të reciprocitetit.

“Nëse dikush nuk e respekton integritetin territorial të Serbisë, pse duhet të jemi të detyruar ta respektojmë integritetin e tyre territorial”, ka pyetur Vuçiq.

Ai tha se kjo bie ndesh me pikën e parë të strategjisë së politikës së jashtme të Serbisë, që është respektimi i normave të së drejtës ndërkombëtare dhe Kartës së OKB-së.

Por nuk duhet të bëni diçka me shumë pasion, pse duhet të nxitojmë të mbrojmë integritetin territorial të dikujt? “Ne mund të heshtim nëse këta njerëz janë kundër integritetit territorial të Serbisë”, tha Vuçiq para gazetarëve..

Vuçiq, megjithatë, shtoi se Serbia, si në vitin 2008, nuk duhet të detyrohet ndaj Malit të Zi dhe Maqedonisë së Veriut dhe të heshtë “ndaj atyre që i detyruan ta bëjnë këtë”.

Megjithatë, ai vlerësoi se disa vende mund të kishin abstenuar dhe të tregonin “të paktën pak vëmendje ndaj Serbisë”, sepse po të kishin abstenuar, siç tha ai, do të ishte njësoj sikur të kishin votuar për pranimin e Kosovës.

Gjatë ditës së sotme edhe Ministri i Punëve të Jashtme të Serbisë, Ivica Daçiq, pasi Mali i Zi votoi pro Kosovës për Këshill të Evropës, tha se ata duhej të ishin përmbajtur, ndërsa “kërcënoi” se edhe ata dikur do të kenë nevojën për votë nga Serbia.

Daçiq tha se mënyra se si votojnë shtetet për fillimin e procedurës për shqyrtimin e kërkesës së Kosovës për anëtarësim në KiE do të ndikojë në mënyrën se si Beogradi do t’i trajtojë ata në të ardhmen.

“Mali i Zi të paktën mund të ishte i përmbajtur. Ne duhet të veprojmë në mënyrë reciproke. Mali i Zi votoi për pranimin e Kosovës. Edhe ata do të kenë nevojë dikur për votën tonë, në të cilën sigurisht nuk do të mund të llogarisin”, tha kreu i diplomacisë.

Daçiq shtoi se është befasuar në mënyrë të pakëndshme nga Ukraina, ku tha se Serbia dënon shkeljen e integritetit territorial të atij vendi në të gjitha rezolutat në mbarë botën dhe Kievi abstenoi.

Ai përmendi edhe abstenimin e Bosnjës e Hercegovinës.

“Sa i përket Bosnjes dhe Hercegovinës, a ka pasur ndonjëherë në fjalimin tim që të mos përmendim integritetin territorial të tyre?” Tani që dikush pyet, ne do të përmbahemi. Pra, pse ne do të ishim pro integritetit territorial të Bosnjë-Hercegovinës dhe ata votojnë me abstenim”, tha Daçiq.