Ministri i Shëndetësisë, Arben Vitia ka thënë se 99% e rasteve të reja me Covid-19 janë me variantin Delta.
“Siç jeni të informuar sot nga 10 mijë testime numri i të infektuarve sot ka mbërri mbi 2100 raste. Varianti Delta tashmë është konfirmuar në gati 99% të rasteve të reja. Ka kohë që ne kemi paralajmëruar se një vale të re të pandemisë me këtë variant do të jetë e pashmangshme”, tha Vitia.
Ai ka thënë se për shkak të përhapjes së shpejt të këtij varianti tregon se ky është një variant shumë i frikshëm.
Në mbledhjen e Qeverisë së Kosovës janë miratuar masat e reja për të parandaluar përhapjen e COVID-19 në Kosovë, sipas propozim vendimit të Ministrisë së Shëndetësisë.
Ministri i Shëndetësisë, Arben Vitia ka bërë të ditur se nga data 20 gusht do të mbyllen klubet e natës dhe do të ndalohen ahengjet familjare, si dasma e fejesa.
Ai u shpreh se nga momenti i publikimit të vendimit, do të shkurtohet edhe orari i gastronomisë.
“Nga data 20 gusht do të mbyllen klubet e natës, do të ndalohen ahengjet si fejesat, dasmat etj. Nga momenti i publikimit të këtij vendimi në faqen zyrtare do të shkurtohet orari i gastronomiosë”, tha Vitia në konferencë për medie.
Ministri i MSh-së, Arben Vitia në mbledhjen e Qeverisë, theksoi se masat për ruajtjen e shëndetit publik janë kritike për të parandaluar përhapjen më të gjerë të virusit dhe të vdekjeve nga sëmundja.
Kryeministri Kurti në fillim të mbledhjes, ka ftuar qytetarët që të vaksinohen kundër Covid-19. Kurti shtoi se marrja e masave të reja është e domosdoshme që të ruhet shëndeti publik.
“Asnjë person që është vaksinuar nuk ka vdekur nga varianti Delta”, tha ai.
