Paneli për Ankesa dha Parashtresa ka anuluar zgjedhjet për kryetar të Komunës së Hanit të Elezit dhe ka çuar në rivotim të katër qendrat e votimit në këtë komunë.

Kandidati i pavarur për kryetar të Hanit të Elezit, Rufki Suma, ishe ankuar në Panelin Zgjedhor për Ankesa dhe Parashtresa (PZAP) lidhur me procesin zgjedhor që është zhvilluar në këtë komunë, e ku kandidati i Partisë Demokratike të Kosovës, Mehmet Balazhi rezultoi se fitoi pa balotazh.

Sipas vendimit të PZAP-së, Suma është ankuar se simpatizantët e PDK-së kanë bërë presion mbi qytetarët e Hanit të Elezit që të votojnë këtë subjekt politik.

E këtë ankesë PZAP e ka marrë si të bazuar, duke e çuar në rivotim procesin zgjedhor për Kryetar të kësaj komune.

“PZAP ka  vendosur në lidhur me ankesën e kandidatit të pavarur Rufki Suma, nga Hani i Elezit paraqitur kundër subjektit politik Partia Demokratike e Kosovës, për shkak të presionit ndaj votuesve, për zgjedhjet lokale në Republikën e Kosovës të datës 17 tetor 2021, në seancën e panelit të mbajtur më datë 21, 10, 2021, mori këtë Vendim. I pranohet e bazuar ankesa e kandidatit për kryetar të Komunës në Han të Elezit, Rufki Suma kandidat I pavarur, e cila mban shenjën A.nr. 639/2021, vetëm për kryetar komune, për shkak  të minimit të integritetit të zgjedhjeve si rezultat i presionit dhe organizimit me qëllim të përfitimit të mbështetjes së votuesve”, thuhet në vendimin e  PZAP-së, shkruan Gazeta Online Reporteri.net.

Sipas rezultateve preliminare kandidati i PDK-së, Mehmet Ballazhi kishte dalë fitues i këtyre zgjedhjeve.