Presidenti Trump i ka injoruar raportimet se ai ka fituar miliarda dollarë përmes lançimit të kriptomonedhës së tij.

Gjatë një konference për shtyp të martën, ditën e tij të parë të plotë në Shtëpinë e Bardhë, Trump u pyet nga një gazetar nëse do të vazhdojë të lançojë produkte vetpërfituese, si monedha $TRUMP.

“Epo, nuk e di nëse ka përfitim. Nuk e di se ku ndodhet aktualisht”, tha Trump në komentet e nënvizuara nga Mediaite. “Nuk di shumë për të, përveçse e kam lansuar. Kam dëgjuar se ishte shumë i suksesshëm. Nuk e kam kontrolluar, ku është sot?”

“Keni bërë shumë para zotëri,” u përgjigj gazetari.

“Sa shumë?”, pyeti Trump.

“Duket se keni bërë disa miliardë dollarë në ditët e fundit,” tha gazetari.

Presidenti e injoroi komentin, duke thënë se disa miliarda janë “lëmoshë” për njerëzit me të cilët ai i ka kaluar ditët e fundit.

Të ulur përpara të emëruarve të kabinetit të tij në Ditën e Inaugurimit të hënën ishin njerëzit më të pasur të teknologjisë: CEO i Meta-s, Mark Zuckerberg, CEO i Apple, Tim Cook, CEO i Google, Sundar Pichai, themeluesi i Amazon, Jeff Bezos dhe CEO i SpaceX dhe Tesla, Elon Musk, i cili është caktuar për të udhëhequr Departamentin e Efiçencës së Qeverisë Trump.

Trump prezantoi kriptomonedhën e tij të parë zyrtare javën e kaluar dhe gjatë fundjavës së inaugurimit të tij si president, monedha u rrit shpejt në vlerë. Çmimi i saj shkoi në gati 30 dollarë deri në mesditë të shtunën dhe vlera e tregut të monedhës ishte 30 miliardë dollarë që nga lansimi.