Ish-presidenti amerikan, Donald Trump, i ka fituar zgjedhjet brenda Partisë Republikane në New Hampshire, me gjasë duke e betonuar vendin e vet si i nominuar i partisë për zgjedhjet presidenciale të nëntorit.
Fitorja e tij kundër Nikki Haley lë të kuptohet se për Trumpin do të jetë një rrugë e lehtë drejt sigurimit të nominimit të partisë. Javën e kaluar, ai fitoi me lehtësi edhe në Iowa, raporton gazeta “The Guardian”.
Duke folur para përkrahësve në Nashua, Trumpi e kritikoi rivalen Haley. “Ajo pati një mbrëmje shumë të keqe. Doli e treta [në Iowa] dhe ende po sillet vërdallë”- tha miliarderi.
Agjencia “Associated Press” e shpalli garën të mbyllur me t’u mbyllur qendrat e fundit të votimit në orën 20, pas një gare të ashpër me përkrahje të të dy kandidatëve nga disa grupe, duke shpenzuar miliona dollarë në reklama televizive.
Pavarësisht nga rezultati dëshpërues në New Hampshire, Haley këmbënguli se do ta vazhdontegarën në shtetin e saj, Karolinë Jugore, ku zgjedhjet partiake do të mbahen muajin e ardhshëm.
Përderisa po fliste para përkrahësve të martën në Concord, Haley e përgëzoi Trumpin për fitoren, por e theksoi edhe rëndësinë e garave të ardhshme.
“New Hampshire është e para [garë] në vend. Nuk është e fundit në vend. Kjo garë është larg fundit. Ka dhjetëra shtete që nuk janë përfunduar dhe i ardhshmi është shteti im i ëmbël, Karolina Jugore”- tha ajo.
Megjithatë, sipas anketave, Trumpi mban epërsi të konsiderueshme edhe në Karolinë Jugore, prandaj është e paqartë se si gara atje mund ta riformësojë dinamikën e zgjedhjeve brenda Partisë Republikane.
Tina Lorenz, e cila tha se e kishte përkrahur Trumpin që nga viti 2016, ishte në mesin e atyre që e votuan edhe të martën.
“Ai po e përfaqëson popullin amerikan. Ai nuk ka dalë për vete. Ai nuk ka dalë për përfitime politike. Ai nuk ka dalë për arsye financiare. Ai nuk ka nevojë për para, nuk ka nevojë për famë dhe pasuri. Ai tashmë i ka të gjitha këto”- tha zonja Lorenz, 63 vjeçe.
“Ai është aty për personin mesatar dhe kjo është ajo që po ndodh, ne jemi bërë aq të polarizuar, saqë nuk është askush aty [në garë] thjesht për njerëz të zakonshëm” – shtoi ajo.
