Evropianët kanë reaguar me zemërim dhe habi ndaj publikimit të pjesëve të një bisede në chat, ku përfaqësues të qeverisë amerikane, përfshirë nënpresidentin J. D. Vance dhe sekretarin e Mbrojtjes Pete Hegseth, shprehnin “urrejtje” dhe “neveri” ndaj Evropës.
Dje, për të mbrojtur zëvendëspresidentin dhe kreun e Pentagonit, Donald Trump e forcoi akoma më shumë pozicionin, duke deklaruar publikisht: “Mendoj se evropianët janë parazitë”.
Por edhe në Shtetet e Bashkuara rasti ka shkaktuar siklet. Deputeti republikan nga Nebraska, Don Bacon, e ka kritikuar hapur chat-in: “Mënyra se si urrejnë Evropën është e turpshme”.
Shumë konservatorë ndihen prej kohësh në siklet për shkak të sulmeve që administrata Trump lëshon ndaj aleatëve historikë.
Vance përshkruhet si “më anti-evropian” se vetë Trump. Ai kishte sulmuar tashmë aleatët në konferencën e Mynihut, kur kishte përmendur një “vetëvrasje të qytetërimit”.
Por tronditëse ishin fjalët në chat-in privat në platformën Signal, të cilat dolën në dritë sepse gabimisht, ishte futur në bisedë edhe drejtori i revistës The Atlantic, Jeffrey Goldberg, i cili publikoi disa pasazhe.
Një nga çështjet ishte vendimi për të sulmuar Houthi-t në Jemen, për të siguruar rrugët tregtare. “E urrej thjesht që po më duhet të shpëtoj përsëri Evropën”, kishte shkruar Vance. “E ndaj neverinë tënde për Evropën, që përfiton pa paguar – është patetike”, i ishte përgjigjur Hegseth. “Por Mike ka të drejtë, jemi të vetmit në botë që mund ta bëjmë këtë. Është vetëm problemi i kohës”.
Në të vërtetë, më shumë se njëzet vende janë të përfshira në mbrojtjen e anijeve tregtare në ato rrugë. Italia, për shembull, e ka shprehur pozicionin e saj përmes ministrit të Jashtëm.
Antonio Tajani komentoi: “Duke thënë që fjala ‘urrejtje’ nuk më pëlqen dhe nuk është pjesë e fjalorit tim, dua të kujtoj se ne i mbrojmë vetë anijet tona tregtare, me Marinën tonë Ushtarake që ka rrëzuar disa dronë të lëshuar nga Houthi-t. Ndoshta Vance, që është i sapo ardhur në detyrë, nuk e njeh mirë kontekstin, por ne jemi pjesë e disa operacioneve bashkë me SHBA-në dhe Mbretërinë e Bashkuar”.
Angela Rayner, zëvendëskryeministrja britanike, tha se «u takon Shteteve të Bashkuara të sqarojnë deklaratat e bëra në privat», por përsëriti forcën e marrëdhënieve me SHBA-në.
Ndërkohë, Mike Martin, anëtar i Komisionit të Mbrojtjes, ishte më pak diplomatik: “Zëvendëspresidenti amerikan dhe sekretari i Mbrojtjes e urrejnë Evropën, ndërsa përpiqen t’i nxjerrin para”.
Qeveritë evropiane kanë tentuar ta ulin tonin. Qeveria gjermane u mjaftua të thotë se “ka lexuar lajmet”.
Ndërkohë, gjenerali francez Michel Yakovleff, që ka punuar për NATO-n, i quajti autorët e chat-it një “tufë idiotësh të paaftë dhe arrogantë”.
Politikat e administratës Trump po shfaqen gjithnjë e më qartë. Në një podcast të fundit, i dërguari për Lindjen e Mesme dhe Ukrainën, Steve Witkoff, mbështeti idenë se ekonomitë e Gjirit mund të zëvendësojnë ato evropiane. “Ato mund të jenë shumë më të fuqishme. Evropa e sotme është jofunksionale”.
Moderatori, Tucker Carlson, mik i ngushtë i Trump-it, shtoi: “Do të ishte mirë për botën, sepse Evropa po vdes”.
