Sergej Jakiroviq, trajner i skuadrës së Dinamos së Zagrebit, ka deklaruar se skuadra e tij do të luaj vetëm për fitore sonte ndaj Ballkanit, ndonëse kroatët sigurojnë kualifikimin edhe me barazim.

Për teknikun boshnjak një pikë nuk është e mjaftueshme. Para ndeshjes ai ka deklaruar se do të sulmojnë nga fillimi i ndeshjes skuadrën e Ballkanit për të shënuar fitore para tifozëve në “Maksimir”.

“Na pret një ndeshje e rëndësishme dhe vendimtarë përballë Ballkanit. Është një ‘finale’ sa i përket kualifikimit. Pres që skuadra ime të zhvillojë një ndeshje serioze dhe shumë të mirë në aspektin taktik. Sigurisht që kualifikohemi edhe me barazim, por ne nuk do të futemi në fushë për një pikë. Do e kërkojmë fitoren prej minutës së parë, kam besim se do arrijmë këtë objektiv dhe do të kualifikohemi”, ka thënë Jakiroviç.

46-vjeçari e ka vlerësuar skuadrën e Ballkanit dhe ka treguar që e ka studiuar mirë në ndeshjet e fundit për të arritur një rezultat pozitiv sonte.

“Nuk e nënvlerësuam Ballkanin në ndeshjen e parë, por kishim shumë mungesa. Ballkanin e njohim mirë, kemi analizuar edhe takimin e tyre të fundit. Ata kanë luajtur mirë gjatë gjithë sezonit, ndërkohë që në ndeshjen e fundit gabuan. Gjithsesi, ne duhet të jemi seriozë kundër tyre, dhe duhet të gabojmë sa më pak”, përfundoi Jakiroviç.

Dinamo e Zagrebit do të jetë nikoqire e Ballkanit sonte në ndeshjen e xhiros së fundit të fazës së grupeve të Ligës së Konferencës.

Kampioni i Kosovës do të arrinte kualifikimin tutje vetëm me një fitore sonte, ndërkaq për Dinamon i vlefshëm është edhe barazimi.