Zyrtarë të Shtetet e Bashkuara të Amerikës i shohin prova bindëse, provat që paraqiti Kosova për sulmin terrorist të 24 shtatorit në fshatin Banjskë, shkruan Reporteri.net.
Në analizën e publikuar nga redaktori i çështjeve botërore të “The Guardian“, Julian Borger, thuhet se grupi paramilitarë i serbëve i zunë në pritë një patrullë të Policisë së Kosovës.
“Më 24 shtator, një grup paramilitarë i serbëve të Kosovës të armatosur mirë i zunë pritë një patrullë të policisë kosovare dhe në përleshjen që pasoi, një polic dhe tre serb të armatosur u vranë. Qeveria e Kosovës paraqiti prova për të treguar se grupi ishte armatosur dhe kontrolluar nga Beogradi, dhe zyrtarët e SHBA-së e kanë bërë të qartë privatisht se i shohin ato prova bindëse”, thuhet në analizën e Julian Borger, redaktor i “The Guardian”.
“Prita mund të ishte projektuar për të ndezur një konflikt në veri të Kosovës që do t’i jepte mbulesë Beogradit për të dërguar trupa gjoja për të mbrojtur serbët etnikë. Një synim alternativ mund të kishte qenë të detyronte KFOR-in të forconte praninë e tij dhe të merrte përgjegjësinë kryesore për sigurinë në veri të Kosovës nga Prishtina. Ky do të ishte një hap prapa për sovranitetin e vendit”, thuhet në analizën e Borger.
Ditën e djeshme, në konferencë për media, Ministri i Punëve të Brendshme, Xhelal Sveçla dhe Drejtori i Policisë së Kosovës, Gazmend Hoxha paraqitën dëshmi të reja nga sulmi terrorist në Bansjkë.
Sveçla prezantoi pamje të reja ku tha se çdo ditë kanë dëshmuar me fakte të patjetërsueshme lidhjen e shtetit serb dhe presidentit serb Aleksandër Vuçiq, me sulmin në fshatin Banjskë, ndërsa shtoi se ky organizim terrorist kishte vetëm një qëllim: aneksimin e veriut të Republikës së Kosovës.
Ministri tutje tha se në këtë tentim-ankesim të veriut të Kosovës, janë të angazhuar drejtpërdrejt Vuçiq, ministri i mbrojtjes së Serbisë, Milosh Vuçeviq dhe shefi i komandës së Ushtrisë së Serbisë, Milan Mojsilloviq.
Ai tha se tash kur provat janë evidente është i domosdoshëm dhe jetik dënimi dhe sanksionimi i këtij sulmi terrorist të Serbisë ndaj Republikës sonë nga ana e faktorit ndërkombëtar.
Madje edhe Policia e Kosovës sqaroi kronologjikisht se si ndodhi ngjarja të dielën e 24 shtatorit.
