Presidenti i Kosovës, Hashim Thaçi është takuar sot në Prishtinë me Kancelarin austriak, Sebastian Kurz.
Pas takimit, në një konferencë për media, Thaçi tha se me Kurz patën rastin që të diskutojnë për zhvillimet në Kosovë mirëpo edhe për përspektivën e rajonit, raporton lajmi.net.
Thaçi tha se Austria si kryesuese e BE-së, ka qenë gjithmonë promovuese e të drejtës së Ballkanit për anëtarësim në BE, mirëpo sipas tij kusht për këto anëtarësime janë marrëdhëniet fqinjësore.
“Patëm rast të diskutojmë për zhvillimet në Kosovë por edhe për përspektivën e rajonit. Austria është duke vazhduar që të kryesojë me BE-në dhe gjatë gjithë kësaj periudhe ka promovuar anëtarësimin e Ballkanit në BE. Prandaj, puna dhe angazhimi ynë për arritjen e këtyre qëllimeve është e vendosur. Në kontekst të këtyre integrimeve euroatlantike, marrëdhëniet e mira fqinjësore janë kusht parësor”, tha Thaçi.
Thaçi tutje tha se Kosova është duke u munduar maksimalisht që të ndërtojë raporte korrekte me Serbinë, si dhe një marrëveshje e cila siguron paqe.
“Po mundohemi maksimalisht që të ndërtojmë raporte korrekte edhe me Serbinë. Kosova mbetet thellësisht e angazhuar për dialogun me Serbinë, e cila siguron paqe të qëndrueshme, njohje reciproke si dhe anëtarësim të Kosovës në organizata ndërkombëtare”, tha ai.
Kurz gjatë ditës së djeshme qëndroi në Beograd.
