Thaçi ka thënë se emri i kësaj kazerme, është emër i lirisë së Kosovës.
“Heroizmi dhe sakrifica e Jasharëve zgjoi ndërgjegjen shqiptare.Heroizmi i Jasharëve mobilizoi botën shqiptare në Kosovë, në Maqedoni në Luginën e Preshevës, në Mal të Zi, në Shqipëri dhe në diasporë. Heroizmi i Jasharëve vuri në lëvizje diplomacinë botërore. Prandaj bota shqiptare me respekt dhe nderim të lartë përkulet në Prekazin legjendar”, është shprehur presidenti, përcjell lajmi.net.
Fjalimi i plotë i Thaçit:
Të nderuar ushtarë, nënoficerë dhe oficerë,
I nderuar komandant Rama,
Zonja dhe zotërinj,
Sot gjendemi para ushtrisë së Kosovës, në kazermën “Adem Jashari” për ta nderuar Epopenë e Ushtrisë Çlirimtare të Kosovës.
Emri i kazermës suaj është emër i lirisë së Kosovës.
Sot, institucionet më të larta shtetërore nderojnë heroizmin dhe sakrificën më të madhe në historinë tonë kombëtare.
Nderojmë njëzet anëtarët e familjes së Shaban Jasharit: burrat, gratë, vajzat, djemtë, fëmijët, nipërit, mbesat.
Nderojmë Komandantin legjendar Adem Jashari, Hamzën dhe gjithë të rënët më 5 dhe 6 mars 1998 në Prekazin heroik.
Heroizmi dhe sakrifica e Jasharëve zgjoi ndërgjegjen shqiptare.
Heroizmi i Jasharëve mobilizoi botën shqiptare në Kosovë, në Maqedoni në Luginën e Preshevës, në Mal të Zi, në Shqipëri dhe në diasporë.
Heroizmi i Jasharëve vuri në lëvizje diplomacinë botërore.
Prandaj bota shqiptare me respekt dhe nderim të lartë përkulet në Prekazin legjendar.
Sa herë që vijnë ditët e Epopesë së UÇK-së kujtojmë çmimin e lirisë së Kosovës.
Kujtojmë me respektin më të lartë sakrificën e mijëra dëshmorëve, kujtojmë martirët dhe gjithë qytetarëve tanë të rënë për liri.
Kujtojmë invalidët, veteranët dhe gjithë ushtarët e lirisë që luftuan në tokën e tyre për lirinë e popullit tonë.
Të nderuar ushtarë të FSK-së
Ju jeni trashëgimtarët e projektit më të suksesshëm politik dhe ushtarak të popullit tonë, – të Ushtrisë Çlirimtare të Kosovës.
Me luftën heroike të UÇK-së, me mbështetjen e qytetarëve të Kosovës dhe të botës demokratike, – Kosova u çlirua dhe u bë vend i lirë, shtet i pavarur dhe demokratik.
Kosova me sukses kaloi fazën e tranzicionit.
U konsolidua dhe po konsolidohet gjithnjë dhe më shumë.
Kosova është storie e suksesshme
Vend i paqes, stabilitetit dhe fqinjësisë së mirë në rajon.
Kosova e ka të qartë të vetmen rrugë dhe perspektivë Atë euroatlantike.
Pas çlirimit dhe shpalljes së pavarësisë ky është objektivi ynë.
Kosova do t’u jetë përjetë mirënjohëse shteteve të demokracisë botërore që e ndihmuan në kohët më të vështira.
Mirënjohëse për kontributin e madh të Shteteve të Bashkuara të Amerikës dhe të NATO-
Të nderuar ushtarë, nënoficerë dhe oficerë
Qytetarët dhe shteti ynë krenohem me ju.
Krenohemi me rezultatet tuaja dhe me gatishmërinë tuaj për të shërbyer kudo që kërkohet.
Disiplina ushtarake, etika e lartë dhe profesionalizmi juaj vërehet kudo në Kosovë.
Jeni institucioni që meritoni respektin e gjerë qytetar të Kosovës.
Pra, ju po rriteni në një forcë të besueshme në sytë e botës.
Ashtu siç i ka hije një vendi paqësor, një shoqërie të ngritur mbi parimin e barazisë, respektimin e të drejtave dhe lirive të të gjithë qytetarëve.
Kosova, që ka dalë nga një luftë e hidhur, e di më së miri vlerën e lirisë, tolerancës dhe paqes.
Prandaj Kosova do të jetë prodhues i paqes, faktor stabiliteti në rajon, shembull i bashkëpunimit ndër-fqinjësor me NATO.
Lavdi gjithë të rënëve për lirinë dhe pavarësinë e Kosovës!
