Në përgjigje të tërmetit të Sichuan-it, Ministria e Punëve të Brendshme të Tajvanit deklaroi se janë mbledhur 40 anëtarë nga Ekipi Special i Kërkimit dhe Shpëtimit, një qen (kërkim dhe shpëtim), pesë tonë pajisje të ndryshme shpëtimi dhe një fluturim me ndihma humanitare ndërkombëtare.

Lajmi u bë i ditur nga reporterja ushtarake dhe e punëve të jashtme në “TVBS News”, Tingting Liu.

Me marrjen e udhëzimeve nga autoritetet tajvaneze, ekipi do të hipë menjëherë në fluturimin çarter dhe do të bashkohet në ndihmën për shpëtimin e viktimave të bllokuara.

Të paktën 65 persona janë konfirmuar të vdekur pas tërmetit që goditi provincën jugperëndimore të Kinës të hënën, sipas transmetuesit kinez CCTV.

Pasgoditjet u ndjenë ende të martën, tha media shtetërore, një ditë pasi Shërbimi Gjeologjik i Shteteve të Bashkuara (USGS) tha se një tërmet me magnitudë 6.6 tronditi rajonin në jugperëndim të kryeqytetit të Sichuan, Chengdu.

Deri më tani janë raportuar 248 të lënduar dhe të paktën 12 persona mbeten të zhdukur, sipas mediave shtetërore.

USGS-ja tha se epiqendra e tërmetit ishte rreth 43 kilometra në juglindje të Kangding-ut, një qytet me rreth 100 mijë banorë.

Mbi një milion banorë në zonat përreth vlerësohet të kenë përjetuar lëkundje të moderuara si pasojë e tërmetit, shtoi njoftimi.