Lideri i Superligës, Ballkani, udhëton drejt Prishtinës me objektiv për ta ruajtur këtë pozicion, derisa Prishtina tashmë e ka të qartë se vetëm në vendin e parë mund t’i kënaqë adhuruesit e saj. Kjo edhe është arsyeja të pritet një ndeshje e fortë në “Fadil Vokrri”, ku të dyja skuadrat kanë vetëm një objektiv, fitoren

Dy skuadrat më në formë momentalisht në futbollin kosovar, Prishtina e Ballkani, sot në stadiumin “Fadil Vokrri” në kryeqytet, nga ora 17:00, ballafaqohen ndërmjet vete në ndeshjen, e cila po cilësohet edhe si “përballja e vitit”.

Lideri i Superligës Ballkani udhëton drejt Prishtinës me objektiv për ta ruajtur këtë pozicion, derisa Prishtina tashmë e ka të qartë se vetëm në vendin e parë mund t’i kënaqë adhuruesit e saj. Kjo edhe është arsyeja të pritet një ndeshje e fortë dhe pa kalkulime, ku të dyja skuadrat kanë vetëm një objektiv – fitoren, shkruan sot gazeta “Zëri”.

Armend Dallku po e cilëson skuadrën e tij favorite, pasi sipas tij Prishtina është skuadra më e fortë për momentin. Kësaj deklarate i është kundërpërgjigjur Ismet Munishi, i cili ka thënë se Ballkani për momentin është ekipi më i fortë në Kosovë dhe këtë do ta dëshmojë sot në përballje me bardhekaltrit. Ndeshja Prishtina – Ballkani luhet nga ora 17:00, derisa ka lënë nën hije përballjet tjera, që zhvillohen këtë vikend, siç është ajo ndërmjet Dukagjinit e Gjilanit, Feronikelit e Trepçës ’89, Flamurtarit me Vushtrrinë dhe Ferizajt me Llapin. Të kujtojmë që të premten Drita e mposhti lehtësisht Drenicën, ndërsa ndeshja e paraparë të luhet këtë ditë ndërmjet Ferizajt e Llapit është shtyrë për ditën e shtunë, pas borës së madhe që ra ditën e premte, shkruan Zëri.info.

Prishtinën e kënaq vetëm fitorja

Prishtina assesi nuk guxon ta humbasë këtë ndeshje, pavarësisht se për taborin bardhekaltër kjo ndeshje nuk është vendimtare. Gjithsesi trajneri i Prishtinës Armend Dallku dhe kapiteni Armend Thaqi thonë se vetëm fitorja është zgjidhje, asgjë tjetër nuk duan. “Ballkani nuk bën përjashtim nga kundërshtarët tjerë. E kemi analizuar kundërshtarin, por edhe lojën tonë, kështu që nuk është e jashtëzakonshme, sepse nuk është ndeshja e fundit që do të vendosë gjithçka. Ne si Prishtina presim fitore dhe futemi në këtë ndeshje për fitore. Mendoj që kemi skuadër për ta mposhtur Ballkanin, por a do të arrijmë fitore mbetet të shihet”, ka thënë Armend Dallku.

I sigurt në fitore duket të jetë edhe kapiteni Armend Thaqi, i cili beson se skuadra e tij ka forcë për ta mposhtur një skuadër si Ballkani. “Mendoj që kemi skuadër për ta mposhtur Ballkanin. Fusha në stadiumin e Prishtinës është ideale dhe ajo do të tregojë më së miri se cila skuadër ka formë më të mirë dhe të arrijë tri pikë. Nuk mendoj se është ndeshje vendimtare dhe në qoftë se fitojmë ne ose nuk e fitojmë ndeshjen prapë nuk është vendimtare, por sigurisht që e synojmë fitoren këtu”, ka thënë Armend Thaqi.

Ballkani: Në Prishtinë e tregojmë forcën tonë

Atmosfera në skuadrën portokalli para ndeshjes me Prishtinën është e jashtëzakonshme, lojtarët mezi po e presin këtë ndeshje, derisa trajneri Ismet Munishi në mënyrën më të mirë të mundshme i ka motivuar lojtarët. “Shijoni këto momente, ju jeni ata që e keni sjellë Ballkanin në këtë situatë, sa i gjithë opinioni ka vëmendjen te ju. Nëse Prishtina po mundohet ta minimizojë këtë ndeshje, duke mos e cilësuar derbi, është vetëm një arsye për ta fshehur frikën. Pra ne jemi gati dhe jemi skuadra më e fortë në Kosovë për momentin, duhet fituar këtë ndeshje”, janë fjalët e Ismet Munishit të drejtuara futbollistëve të tij. Munishi e pranon se ndeshja e sotme është e vështirë, por ai beson në skuadrën e tij. “I dimë vlerat e kundërshtarit dhe i respektojmë ato, por ne shkojmë për t’i treguar vlerat tona dhe për ta fituar ndeshjen, ky është objektivi ynë”, ka thënë Munishi për “Zëri”. Optimist para ndeshjes është parë edhe kapiteni i therandasve Visar Berisha, që në të kaluarën ka shijuar fanellën e Prishtinës. “Është një ndeshje shumë e fortë, por nuk do ta cilësoja vendimtare, pasi deri në fund janë edhe 13 ndeshje për t’u luajtur. Ne jemi gati dhe kemi punuar shumë për këtë sfidë”, ka thënë Berisha për gazetën “Zëri”, i cili tregon edhe për atmosferën në skuadër. “Atmosfera është shumë e mirë, skuadra është gati dhe përveç Besnik Krasniqit, i cili mungon për shkak të kartonëve, të gjithë të tjerët janë në dispozicion. Sa i përket atmosferës, besoj se do të jetë një atmosferë e mirë, pasi edhe tifozët tanë janë duke u përgatitur dhe duke u mobilizuar për të qenë sa më shumë në atë ndeshje”, ka përfunduar Visar Berisha.

Prishtina – Ballkani në statistika dhe në fakte

Ballkani kryeson Superligën me 40 pikë, tri më shumë sesa Prishtina, që është e treta, me 37 pikë. Ballkani është skuadra më e mirë si vendase, ku nga 10 ndeshje i ka fituar 9 prej tyre dhe ka barazuar 1 herë, duke qenë e para edhe me shënimin e golave, 27.

Prishtina si vendase me një ndeshje më pak se Ballkani, nga 9 prej tyre i ka fituar 6, 1 barazim dhe 2 humbje. Bardhekaltrit janë skuadra më e mirë mysafire, si me pikë, po ashtu edhe me pësimin e golave, vetëm 5, aq sa ka pranuar edhe Ballkani, por therandasit janë më të dobët në shënimin e golave si mysafirë, vetëm 5. Ballkani në Superligë nga paslufta i ka vetëm 5 edicione dhe me Prishtinën është përballur edhe me ndeshje kupe, gjithsej në 10 takime. Prishtina ka 7 fitore, 1 barazim dhe 3 fitore të Ballkanit me goldallim +17, 22:5. /Zëri.info

Box

Orari

E premte

Drita – Drenica 4:1

E shtunë

17:00 Prishtina – Ballkani

13:00 Feronikeli – Trepça ’89

13:00 Dukagjini – Gjilani

13:00 Ferizaj – Llapi

E diel

13:00 Flamurtari – Vushtrria

Tabela

1. Drita 20 40

2. Ballkani 19 40

3. Prishtina 19 37

4. Gjilani 19 35

5. Feronikeli 19 28

6. Llapi 19 28

7. Trepça ’89 19 26

8. Drenica 20 24

9. Flamurtari 19 22

10. Ferizaj 19 19

11. Vushtrria 19 15

12. Dukagjini 19 9