Dy javë pas dorëheqjes së Ramush Haradinajt nga posti i kryeministrit, sytë e të gjithëve kanë mbetur të drejtuar kah presidenti Hashim Thaçi, i cili nuk i ka ftuar akoma drejtuesit e partive kryesore politike në konsultime, ashtu si e parasheh Kushtetuta.
Mirëpo, Burime te Reporterit mësojnë se tashmë ka lëvizje në këtë drejtim. Konkretisht, presidenti Thaçi gjatë ditës së sotme pritet të takohet me kryetaren e KQZ-së, Valdete Daka me të cilën do të konsultohet rreth zgjedhjeve të parakohshme. Takimi pritet të zhvillohet në orën 10:00.
Kujtojmë se gjatë ditës së djeshme, Thaçi ka takuar përfaqësuesit e dy subjekteve të komuniteteve joshumicë, Partisë Demokratike Turke të Kosovës (KDTP) dhe subjektit “Vakat” nga Grupi Parlamentar 6+, me të cilët ka biseduar për zhvillimet politike pas dorëheqjes së kryeministrit, pasi që Republika e Kosovës ka mbetur pa qeveri.
Ndërkohë, në anën tjetër, dje kishte edhe një takim tjetër në mes të liderëve të koalicionit qeverisës, Ramush Haradinaj, Fatmir Limaj e Behgjet Pacolli. Aty nuk ishte i pranishëm kryetari i PDK-së, Kadri Veseli.
