Ka pesë muaj prej kur presidenti Hashim Thaçi dhe kryeministri Ramush Haradinaj nuk kanë zhvilluar takime sy më sy, të rëndomta për përfaqësues shtetërorë, ka thënë të mërkurën një burim i gazetës në Qeveri.

Një të tillë pritet të mos e realizojnë as përpara Samitit të Berlinit që do të mbahet në fund të prillit, e në të cilin do të shkojnë të dy.

“Deri tash nuk ka një koordinim dhe nuk pres të ketë as para udhëtimit për në Berlin”, ka thënë ky burim i gazetës. “Nuk jam i sigurt që do të udhëtojnë bashkë”.

Dialogu i Kosovës me Serbinë do të jetë temë qendrore e samitit, që për nikoqir e ka kancelaren gjermane Angela Merkel dhe presidentin francez Emmanuel Macron. Ai zhvillohet në kohën kur ndodhet në ngërç faza finale e dialogut mes këtyre dy shteteve, shkruan Koha Ditore.

Serbia ka vendosur të mos marrë pjesë në të, për aq kohë sa Qeveria e Kosovës nuk e heq tarifën prej 100 për qind, të vendosur ndaj produkteve me origjinë serbe.  /