Shtëpia e Bardhë ka lëshuar një deklaratë zyrtare pas bisedës telefonike mes ish-presidentit të SHBA-së, Donald Trump, dhe presidentit rus, Vladimir Putin. Sipas njoftimit, të dy liderët diskutuan për nevojën e paqes dhe një armëpushimi në luftën e Ukrainës, duke theksuar se konflikti duhet të përfundojë me një marrëveshje të qëndrueshme paqeje.

Gjatë bisedës, thuhet se Trump dhe Putin theksuan domosdoshmërinë e përmirësimit të marrëdhënieve dypalëshe midis ShBA-së dhe Rusisë.

Sipas komunikatës së Shtëpisë së Bardhë, hapi i parë drejt paqes do të përfshijë një armëpushim në sektorin e energjisë dhe infrastrukturës, si dhe negociata teknike për zbatimin e një armëpushimi detar në Detin e Zi.

Komunikata e plotë:

Sot, Presidenti Trump dhe Presidenti Putin folën për nevojën e paqes dhe një armëpushimi në luftën në Ukrainë. Të dy liderët ranë dakord që ky konflikt duhet të përfundojë me një paqe të qëndrueshme. Ata theksuan gjithashtu nevojën për përmirësimin e marrëdhënieve dypalëshe midis Shteteve të Bashkuara dhe Rusisë. Gjaku dhe burimet financiare që si Ukraina ashtu edhe Rusia kanë haxhuar në këtë luftë do të ishin përdorur më mirë për nevojat e popujve të tyre. Ky konflikt nuk duhej të kishte nisur kurrë dhe duhej të ishte përfunduar prej kohësh me përpjekje të sinqerta dhe me mirëbesim për paqe.

Liderët ranë dakord që procesi drejt paqes do të fillojë me një armëpushim në fushën e energjisë dhe infrastrukturës, si dhe me negociata teknike për zbatimin e një armëpushimi detar në Detin e Zi, një armëpushim të plotë dhe një paqe të përhershme. Këto negociata do të nisin menjëherë në Lindjen e Mesme.

Liderët diskutuan gjerësisht për Lindjen e Mesme si një rajon me potencial për bashkëpunim në parandalimin e konflikteve të ardhshme. Ata gjithashtu biseduan për nevojën për të ndaluar përhapjen e armëve strategjike dhe do të angazhohen me të tjerët për të siguruar zbatimin më të gjerë të mundshëm të kësaj mase.

Të dy liderët ndanë pikëpamjen se Irani nuk duhet të jetë kurrë në një pozitë për të shkatërruar Izraelin. Ata gjithashtu ranë dakord se një e ardhme me marrëdhënie të përmirësuara midis Shteteve të Bashkuara dhe Rusisë ka përfitime të mëdha. Kjo përfshin marrëveshje të mëdha ekonomike dhe stabilitet gjeopolitik pasi të jetë arritur paqja.