Rreth 90 persona humbën jetën ndërsa qindra të tjerë u plagosën në një ngjarje të paprecedentë për Greqinë, e cila u përball në muajin korrik me një nga tragjeditë më të mëdha të këtij shekulli.
Fjala është për ngjarjet e frikshme të zjarrit të qëllimshëm që u vu në zonën e Matit në rrethinat e kryeqytetit. Flakët morën përpara ç’të gjenin, shtëpitë, makinat, kafshët shtëpiake, burra e gra, përfshi dhe fëmijët.
Por në mesin e kaosit që shkaktoi zjarri i disa javëve më parë, të shumtë ishin ata njerëz që përballë tmerrit të flakëve, vendosën të ndihmonin dhe kë u dilte përpara tymit e zjarrit. Një prej tyre ka qenë një shqiptar si dhe dy emigrantë nga Egjipti, të cilët janë vlerësuar nga kryeministri Tsipras këtë të martë, në vizitën e tij në zonën më të prekur, në Mati.
Qeveria ka vendosur t’i japë nënshtetësinë këtyre heronjve, ndërsa dekreti ju dërgua Presidentit për miratim.
