Në një atmosferë entuziaste dhe me pjesëmarrje të madhe të qytetarëve, Lidhja Demokratike e Kosovës (LDK) mbajti sonte një tubim elektoral në palestrën sportive të Lipjanit. Në këtë tubim, ku morën pjesë kryetari i LDK-së dhe kandidati për kryeministër, Lumir Abdixhiku, si dhe kryetari i Komunës së Lipjanit, Imri Ahmeti, u shpalos një poster gjigand me imazhet e tyre, duke simbolizuar bashkimin dhe përkushtimin për të ardhmen e qytetarëve. Shkruan “Gazeta Projekti”
Në fjalën e tij para të pranishmëve, Abdixhiku falënderoi qytetarët për mbështetjen dhe tha se LDK-ja është e gatshme të sjellë ndryshime pozitive për Kosovën. Ai vlerësoi punën e Imri Ahmetit në Lipjan, duke e cilësuar atë si një model të suksesshëm të qeverisjes lokale.
“Imri Ahmeti ka dëshmuar për vite me radhë se qeverisja me përkushtim dhe vizion sjell rezultate të prekshme për qytetarët. Lipjani është një shembull i zhvillimit të qëndrueshëm dhe ky model do të zgjerohet në gjithë vendin,” tha Abdixhiku.
Nga ana tjetër, Imri Ahmeti shprehu mirënjohjen e tij për përkrahjen e LDK-së dhe qytetarëve të Lipjanit, duke premtuar vazhdimin e projekteve zhvillimore në komunë.
Tubimi u shoqërua me brohoritje e duartrokitje nga mbështetësit e LDK-së, të cilët e panë shpalosjen e posterit si një mesazh të fuqishëm për unitetin dhe fuqizimin e partisë në prag të zgjedhjeve.
Pritet që fushata e LDK-së të vazhdojë me aktivitete të tjera në qytete të ndryshme të Kosovës në ditët në vijim.
