Robert Badinter, jurist i njohur nga Franca, ka vdekur në moshën 95-vjeçare. Ish-politikani francez ishte edhe ministër i Drejtësisë në Francë dhe njeriu kryesor prapa nismës për heqjen e dënimit me vdekje në këtë vend.
Siç shkruan Reuters, Badinter ishte një intelektual hebre, babai i të cilit vdiq në një kamp përqëndrimi gjerman, ndërsa vetë ishte objekti i urrjetjes nga ana e të djathtës franceze, disa prej tyre të ngjyrosur me anti-semitizëm.
Në Kosovë, Badinter është i njohur për udhëheqjen e një komisioni ndërkombëtar në lidhje me shpërbërjen e Jugosllavisë, që ishte emëruar nga Këshilli i Ministrave të Komunitetit Ekonomik Evropian, pararendëses së BE-së.
Në opinionin e Komisionit të Badinterit, siç njihet gjerësisht, u theksua se Jugosllavia është në process të shpërbërjes. Sipas pikëpamjes së Komisionit të Badinterit, të drejtë të shkëputjes nga ky proces i shpërbërjes kanë republikat federative, duke ua mohuar këtë të drejtë krahinave autonome vetëqeverisëse, siç atëbotë ishte Kosova.
