Kandidati për deputet nga Aleanca për Ardhmërinë e Kosovës, Ramush Ahmetaj, ka zhvilluar një tubim elektoral në lagjet Dardania I, II dhe III në Pejë, ku ishte i pranishëm edhe Gjenerali Daut Haradinaj së bashku me kandidatët tjerë të AAK-së, shkruan Gazeta Projekti.
Ahmetaj u shpreh se pjesëmarrja dhe mbështetja e madhe që po merr Aleanca në këtë fushatë është një motivim shtesë për të vazhduar punën drejt një të ardhmeje më të mirë për qytetarët e Kosovës. “Është nder, krenari dhe përgjegjësi të jesh votues dhe pjesë e AAK-së,” janë fjalët që, sipas tij, janë dëgjuar nga shumë përkrahës të Koalicionit “Për Kosovën Fituese.”
Ai theksoi se ky koalicion ka një identitet dhe histori të fuqishme, duke kujtuar se themeluesi i tij, Ramush Haradinaj, është një figurë e rëndësishme për Kosovën dhe një lider që ka dhënë kontribut të jashtëzakonshëm për lirinë e vendit. Ahmetaj shprehu bindjen e tij se së shpejti Ramush Haradinaj do të marrë pozitën e Kryeministrit të Kosovës.
Në përfundim të tubimit, ai ftoi qytetarët që të mbështesin Aleancën dhe të votojnë për kandidatët e saj.
