Janë publikuar mesazhe nga grupi i Viber-it të anëtarëve të kryesisë qendrore të LDK-së, ku pjesë e diskutimit është edhe kryetari i partisë, Lumir Abdixhiku.

Mesazhet, e siguruara nga Reporteri, tregojnë një bisedë mes ish-shefit të grupit parlamentar të LDK-së, Arben Gashi, dhe Kujtim Shalës, ku përmendet vjedhja e votave të diasporës.

Gashi e cilëson këtë rast si një “skemë kriminale” dhe kërkon që të trajtohet si e tillë.

“Faktet po ulërasin o Kujtim. Ti duhet me u pajtu me shqetësimin, për krimin që ka ndodhë,” shkruan Gashi në mesazhet e publikuara.

Në përgjigje, Kujtim Shala thekson se “asnjë manipulim nuk është i tolerueshëm”.

Gashi insiston: “Kujt, qitja emrin, nuk është manipulim, është skemë e organizuar kriminale. Pa e identifikuar saktë problemin, nuk mundemi me e shpëtu partinë.”

Publikimi i këtyre mesazheve ka ngritur debate brenda partisë, duke shtuar shqetësimet për procesin zgjedhor dhe integritetin e tij.