Gjykimi ndaj dy udhëheqësve të Organizatës së Veteranëve të Luftës, Hysni Gucati e Nasim Haradinaj, tashmë ka hyrë në fazën finale. Për javën e ardhshme janë caktuar seancat për dhënien e fjalës përfundimtare, përderisa Zyra e Prokurorit të Specializuar në Hagë, tashmë ka paraqitur kërkesën e saj për dënimin e të akuzuarve.
Dosjen përfundimtare të lëndës, prokuroria që udhëhiqet nga Jack Smith, e ka dorëzuar te trupi gjykues. Në këtë parashtrim mbi 150 faqe, Zyra e Prokurorit të Specializuar ka prezantuar kërkesën që Hysni Gucati dhe Nasim Haradinaj të dënohen me nga 6 vjet burgim secili.
Arsyetimin për këtë, Prokuroria e ka mbështetur në zbulimin e dosjeve nga Gucati dhe Haradinaj në vitin 2020, kërcënimin ndaj dëshmitarëve, dhe publikimin e informacioneve konfidenciale.
“Duke pasur parasysh këto fakte, dënimet që Kolegji mund t’i shqiptojë të akuzuarve, peshën e veprave penale, faktorëve rëndues, mungesën e faktorëve lehtësues, secili i akuzuar duhet të shpallet fajtor për të gjitha veprat penale në aktkauzë, dhe të dënohet me gjashtë vjet burgim dhe gjobë simbolike prej 100 eurosh”, thuhet në parashtrimin e Prokurorisë.
Zyra e Prokurorit të Hagës në mesin e fakteve të prezantuara, flet edhe për dëshmitë e dëshmitarëve të saj, por përmend edhe përgjigjet e vetë Gucatit dhe Haradinajt, kur u morën në pyetje si dëshmitarë.
“Të dy të akuzuarit e kanë përdorur dëshminë e tyre për ta vazhduar agjendën e tyre kundër Dhomave të Specializuara të Hagës. Ata u shmangën vazhdimisht, duke u përgjigjur në pyetje me tendenca politike”, shkruan tutje në parashkrimin e prokurorisë.
Sipas qëndrimeve të Zyrës së Prokurorit të Specializuar, dy të akuzuarit kanë qenë në dijeni se publikimi i këtyre dosjeve, është në kundërshtim me ligjin, dhe sërish kanë vazhduar duke kryer këto vepra penale.
“Materiali që përbëhej nga kërkesat për bashkëpunim me autoritetet shtetërore, deklaratat e dëshmitarëve, produktet e punës nga task-forca hetimore, është bërë publike nga të akuzuarit në konferenca për media. Këto botime janë të pakthyeshme, pasi artikujt mbeten online”, pretendon Prokuroria.
Hysni Gucati e Nasim Haradinaj ishin arrestuar në fundin e muajit shtator të vitit 2020. Deri tek arrestimi i tyre erdhi pasi udhëheqësit e OVL-UÇK-së, kishin organizuar tri konferenca për media në periudha të ndryshme kohore, duke publikuar disa dosje, prejardhja e të cilave nuk dihej.
Gjykimi ndaj tyre është zhvilluar me një ritëm të përshpejtuar, ku pati dëshmitarë të ftuar si nga ana e Prokurorisë, ashtu edhe e mbrojtjes. Vetë të akuzuarit, zbulimin e dosjeve e kanë arsyetuar me interesin publik, për të dëshmuar siç thonin ata, bashkëpunimin e Gjykatës Speciale me Serbinë.
Pasi të dëgjohen fjalët përfundimtare gjatë javë së ardhshme, trupi gjykues do ta caktojë një datë për shpalljen e vendimit final.
