Gjatë ditës ka pasur reagime të mëdha nga aktivistët që kanë shprehur pakënaqësinë e tyre lidhur me këtë veprim, që sipas tyre i sjellë dëme të mëdha ambientit që edhe ashtu është në gjendje të keqe në Prishtinë.
Por, gjithçka nisi rreth orës 22:00 në hapësirën e Bibliotekës Kombëtare në kampusin e Universitetit të Prishtinës.
Me të marrë fund koncerti ku performoi Elvana Gjata, një numër i madh fishekzjarresh kanë trazuar qiellin e kryeqytetit këtë mbrëmje.
Kurse, disa ditë para koncertit, ambientalistët kishin dalë kundër ndezjes së fishekzjarrëve duke kërkuar sqarime nga institucionet, që pavarësisht ajrit të ndotur, po japin leje për hedhjen e mjeteve piroteknike.
Komuna e Prishtinës ka thënë se nuk i takon asaj të vendosë për mjetet piroteknike dhe organizatorin e kishte drejtuar te Ministria e Punëve të Brendshme.
E kjo ministri duket se nuk ka komunikim fare me Ministrinë e Mjedisit dhe Planifikimit Hapësinor që ka dalë haptas duke thënë se është kundër mjeteve piroteknike.
Viteve të fundit, Prishtina është një nga qytetet me ajrin më të ndotur në botë.
