Policia e Kosovës ka ndaluar një shtetas turk me dyshimin për prodhim dhe shpërndarje të produkteve të dëmshme mjekësore.
Rasti ka ndodhur të premten në Prishtinë, ku Njësia Rajonale për Hetimin e Krimeve Ekonomike dhe Korrupsionit pas sigurimit të provave ka ndaluar një të dyshuar mashkull shtetas turk, tek i cili kanë gjetur një sasi të materialit që përdoret në mjekësi (botoks).
“Gjatë kontrollit në shtëpinë e të dyshuarit është gjetur edhe një sasi tjetër e materialit të njëjtë që është sekuestruar nga Inspektorët e Ministrisë së Shëndetësisë. Vlera totale e materialit të sekuestruar sipas çmimit në treg sillet rreth 150 000 euro”, thuhet në njoftim.
Në cilësi të provave materiale nga i dyshuari janë sekuestruar edhe 11 160 euro para kesh.
Në konsultim me prokurorin i dyshuari pas intervistimit është dërguar në mbajtje.
