Në Qendrën e Numërimit dhe Rezultateve(QNR) ka përfunduar procesi i rinumërimit të 1407 vendvotime për të cilat kishte vendosur PZAP-i pas shpalljes së rezultateve përfundimtare.

Zëdhënësi i Komisionit Qëndror të Zgjedhjeve (KQZ) Valmir Elezi, tha se ka përfunduar procesi i rinumërimit, dhe rezultati final më së largu deri nesër mund të bëhen publike.

“Tash ka përfunduar rinumërimi i 1407 vendvotimeve. Falënderojmë të gjithë zyrtarët e numërimit që me përkushtim kanë punuar në përmbylljen e këtij procesi. Sot është dita e 12 e rinumërimit që nga vendimi i PZAP-it. Para se KQZ të bëjë certifikimin e rezultatit të zgjedhjeve, merr konfirmimin nga PZAP dhe Gjykata Supreme që nuk ka ndonjë çështje që është në shqyrtim. Rezultatet pas këtij procesi do të publikohen në web-faqen e KQZ-së”, ka thënë Elezi.

Kujtojmë, se më 7 nëntor, KQZ kishte shpallë rezultatet përfundimtare të zgjedhjeve të 6 tetorit, ndërsa më 11 nëntor PZAP mori vendim për rinumërimin e këtyre vendvotimeve, kurse më 13 të këtij muaj kishte nis procesi i rinumërimit të mbi 1400 vendvotimeve.