Ministri i Infrastrukturës, Pal Lekaj u është drejtuar qytetarëve të Gjakovës, prej të cilëve ka marrë mesazhe të shumta.
Përmes një postimi në Facebook, Lekaj ka thënë se e di shumë mirë rëndësinë e investimit në këtë komunë, duke shtuar se e di mirë që është e vështirë të riparohen katër vitet e humbura kur komuna e Gjakovës nuk ishte nën udhëheqjen e AAK-së.
Më tej ai ka thënë se mesazhet e tyre janë lajmi më i mirë për vendin, sepse, sipas tij, kjo tregon se qytetarëve i është kthyer shpresa.
“Qytetarë të Gjakovës, kohëve të fundit kam pranuar shumë mesazhe nga ju, dhe me të drejtë kërkoni që të jemi afër jush. Dua të ju them që unë e di shumë mirë se sa i rëndësishme dhe i nevojshëm është investimi në rrugën e Cufadolit, e Rekës së Keqe, në Cërmjan, në Has e në çdo cep të komunës së Gjakovës, por e di shumë mirë se sa i nevojshëm është investimi edhe në çdo komunë anë e mbanë Kosovës. Është e vështirë t’i riparojmë katër vitet e humbra kur komuna e Gjakovës ishte e “vdekur” për nga funksionaliteti i saj, por bashkë me kryetarin, Ardian Gjini, jemi duke punuar çdo ditë, pa u ndalur, që t’i kthejmë investimet e Qeverisë qendrore që munguan për tetëmbëdhjetë vite, gjithmonë duke mos i harruar edhe komunat tjera. Për mua mesazhet e juaja janë lajmi më i mirë për vendin, sepse, më në fund është kthyer shpresa dhe besimi tek Ju, duke besuar fuqishëm që është dikush i cili po punon për ju. Prandaj, po ju drejtohem me këtë mesazh, që t’ju tregoj për përkushtimin tim të përditshëm në ndërtimin e një infrastrukture të zhvilluar. Bashkë mundemi!”, ka shkruar Lekaj.
