Me ftesë të Presidentit të Këshillit të BE-së, Charles Michel dhe të Kryeministrit të Spanjës, Pedro Sanchez, Presidentja e vendit, Vjosa Osmani ka udhëtuar drejt Granadës të Spanjës për të përfaqësuar Kosovën në samitin e tretë të Komunitetit Politik Evropian (EPC), shkruan Reporteri.net.
Ky samit do të mbledhë krerë shtetesh nga 47 vende të kontinentit evropian, ku Osmani me ta do të zhvillojë edhe diskutime për t’i informuar lidhur me agresionin e Serbisë kundër Kosovës.
“Presidentja e Republikës së Kosovës, Vjosa Osmani, me ftesë të Presidentit të Këshillit të Bashkimi Evropian, Charles Michel dhe Kryeministrit të Spanjës, Pedro Sanchez, ka udhëtuar për në Granada të Spanjës, ku do ta përfaqësojë Kosovën në samitin e tretë të Komunitetit Politik Evropian (EPC).
Ky samit do të mbledhë krerë shtetesh nga 47 vende të kontinentit evropian si dhe liderët e institucioneve evropiane, me qëllim të nxitjes së dialogut politik dhe forcimit të bashkëpunimit për t’i adresuar çështjet më urgjente të sigurisë dhe stabilitetit në Evropë në mënyrë që Evropa të jetë më e qëndrueshme, e begatë dhe gjeostrategjike.
Krahas pjesëmarrjes në sesionet kryesore të Komunitetit Politik Evropian, Presidentja Osmani do të zhvillojë edhe diskutime me liderë evropianë për t’i informuar lidhur me agresionin e Serbisë kundër Kosovës dhe për të diskutuar thellimin e bashkëpunimit për tejkalimin e sfidave të përbashkëta. Para liderëve evropianë, Presidentja Osmani pritet të përçojë mesazhin e përkushtimit të palëkundur të popullit dhe institucioneve të Republikës së Kosovës për paqe, stabilitet dhe siguri në vend dhe rajon”, thuhet në komunikatën e lëshuar për media.
Sot, gazeta britanike “The Guardian”, përmes burimeve të saj, raportoi se po punohet për t’u ndërmjetësuar një takim mes presidentes Vjosa Osmani, dhe presidentit serb Aleksandar Vuçiq, të enjten në Granda.
“Vuçiq dhe Osmani do të marrin pjesë në një samit në Granada të 51 liderëve evropianë të enjten dhe burimet thonë se ka përpjekje për t’i bërë bashkë ata në një dhomë pavarësisht armiqësisë politike midis dy vendeve”, shkroi gazeta britanike.