Blendi Fevziu ishte i ftuar këtë të hënë në një rrëfim ndryshe në ‘ABC e Mëngjesit’. Veç pasionit të udhëtimeve dhe vendeve që ka vizituar këtë verë, Blendi foli edhe për karrierën e gjatë në gazetari dhe, në Tv Klan, me emisionin ‘Opinion’, në veçanti.
Tani që programi i drejtuar prej tij ka hyrë në vitin e 26-të të tij, Fevziu është i bindur se në asnjë ekran tjetër s’do ta gjente veten më mirë. Madje, ai sot rrëfeu edhe për një ofertë që ka marrë nga miku i tij, Ben Blushi, për të drejtuar Top Channel, por që e refuzoi.
“Ka qenë një ide e imja që të lëvizja në Top Channel, që lidhej me drejtimin e Top Channel nga një prej miqve të mi të fëmijërisë dhe të shkollës që ishte Blushi. Por që nuk kam ndërmend të ndryshoj dhe nuk besoj që të ndryshoj më.
Besoj që e kam lidhur karrierën time me Klanin tani. Unë nuk jam njeri që kam lëvizur shumë, gjithë karrierën time kam ndërruar dy vende pune. Kam gjithmonë bindjen që njeriu investohet në një vend dhe sa më shumë të qendrojë në një vend, aq më shumë e krijon raportin”, tha Fevziu.
