Me rastin e Ditës Ndërkombëtare të Autizmit, nesër më 2 prill, në ora 11:00, në Graçanicë do të vendoset gurthemeli i Qendrës për Rehabilitim dhe Arsimim – projekti më i madh i shoqatës humanitare “Jetimat e Ballkanit”.

Ky kompleks modern, i cili do të shtrihet në një sipërfaqe prej 13.5 hektarësh, është konceptuar si një qendër gjithëpërfshirëse për fëmijët dhe të rriturit me autizëm, sindromën Down dhe aftësi të kufizuara.

Ai do të ofrojë shërbime të specializuara rehabilituese, edukative dhe terapeutike, duke siguruar një mjedis të sigurt dhe të përshtatshëm për zhvillimin e individëve me nevoja të veçanta.

Kryetari i shoqatës “Jetimat e Ballkanit”, Halil Kastrati, e ka shpërndarë lajmin në rrjetet sociale, duke ftuar të gjithë ata që dëshirojnë të marrin pjesë në këtë ngjarje të rëndësishme.

“Ftojmë të gjithë ata që duan të jenë pjesë e kësaj ngjarjeje të rëndësishme! Zoti kurrë mos ju humbtë të gjithëve që po kontribuoni në këtë vepër të madhe”, ka shkruar ai në Facebook.

Ndërtimi i këtij kompleksi do të ndikojë ndjeshëm në përmirësimin e jetës së personave me nevoja të veçanta, duke ofruar jo vetëm shërbime cilësore të kujdesit, por edhe mundësi për një arsim dhe trajtim të përshtatshëm.

Projekti synon të krijojë një qendër model për përkujdesjen dhe integrimin e personave me aftësi të kufizuara, duke kontribuar në një shoqëri më gjithëpërfshirëse dhe të barabartë.

Pritet që në ceremoninë e vendosjes së gurthemelit të marrin pjesë përfaqësues të institucioneve, organizatave humanitare dhe qytetarë të shumtë, të cilët e mbështesin këtë nismë humane.

Ky projekt shënon një hap të madh në përkushtimin ndaj personave me aftësi të kufizuara dhe në krijimin e një mjedisi më të mirë për ta.