Largimi i 80 varrezave me mjete të rënda nga një hapësirë në fshatin Gjocaj në Junik u ngrit si çështje në emisionin në “Jeta në Komunë”, në të cilin kryetari i Komunës së Junikut, Ruzhdi Shehu ishte përballë Jeta Xharrës dhe Asamblesë Komunale.

Sipas banorit Riza Ganijaj, kjo u bë me vendim të drejtorit të Shërbimeve Publike të Junikut, Demorat Ganijaj, pasi që toka ku ishin varrezat ishte në emrin e babait të drejtorit të Shërbimeve Publike.

“Më kanë thirrë më kanë thanë të lagjes si më i vjetër, kujtojsha që po bohet mirë, ama ju kam thanë që gabim kanë bërë që i kanë  hekë. Më kanë vetë sa varreza kanë qenë ju kam thanë mbi 80 vorre i kanë gjujtë krejt këtej shpatit. Unë e di qetu kanë qenë varrezat e mahallës së epërm, Qerimt, tash janë në Rashiq ata,  dhe Ganiajt, krejt varre të Gjocajve kanë qenë. Po kanë  qenë të identifikueshme. Nuk e di i ka konvenu me i prishë. I ka hek varret, i ka hek krejt i ka gjujtë poshtë. Ankesa ka pas pse i kanë hekë varrezat. Varrezat gjynah janë me u hek”- kishte thënë Riza Ganijaj për ekipin e “Jeta në Komunë” i cili u transmetua më 19.10.2024.

 

Zenel Maloku, asamblisti i AAK-së në Junik tha se veprimi i heqjes së varrezave dhe hedhja e tyre në një humnerë në Gjocaj është një akt qyqar.

“Unë jam prej fshatit Gjocaj, nuk kam pasur askënd nga familja jem që ka hy në dhe aty, po aty kanë qenë 350 metra katror varreza, është pronë publike. Një familje 8 i ka pas, kush të jep leje me shti bager në varreza me i gjujt në shpat. Kush e jep atë lejë, atë e ka dhanë komuna me vulë. Unë kam qenë aty, kam shku me polici, kur kemi shku e kemi gjet bagerin i kish pas hek 3 hise. Unë me hek varreza? Kurrë zoti mos ma boftë. Policia kur erdh tha puna koka kry s’kemi kurrgjë këtu”- tha Maloku.

Ai shtoi edhe se drejtori Demokrat Ganijaj i kishte thënë se “unë jam menaxher këtu, baba është financier”.

“Unë e pyeta a ke marrë leje në komunë a çka ka ndodhur këtu? Nuk muj me ja dhanë lejen unë drejtorit me i thanë është pronë e shtetit e bëj çka të duash si qytetar”- tha Maloku tutje.

“Këtu ka ndodhur një akt qyqar në Komunën e Junikut që nuk ka ndodhur askund në Kosovë. Me ja shti bagerin varrezave e me i gjujt në shpat është akt qyqar. Duhet kryetari mu pendu për atë çka i ka ndodh në komunë. Unë me marrë bagerin dhe me shku me ja shti bagerin varrezave unë përfundoj në Pejë në burg”- shtoi Maloku.

E për këto akuza foli edhe drejtori i Shërbimeve Publike në Junik, Demokrat Ganijaj.

“Prona që u rrafshu aty është prona e jona si familje, rruga që është ndërtu për bjeshkë ka kalu nga prona jonë, dhe me kalimin e rrugës janë dëmtuar kanalet e ujitjes, edhe prindi baba ka marrë një iniciativë me rrafshu pronën tonë private. Pastaj është konsultu me këta banorë aty nga rruga kanë pshtu vec 2 varreza pa u dëmtu”- tha drejtori Ganijaj.

E Jeta Xharra kërkoi sqarime për ta marrë përgjigjen e saktë se cfarë toke ka qenë ajo private apo publike.

“Jo ajo ka qenë publike nëse nuk gaboj”- u përgjigj Demokrat Ganijaj ndërsa Jeta Xharra i kthen “a the parëz që toka ishte private?”.

“Një pjesë e asaj, është pjesë e vogël që ka qenë e destinuar për varreza dhe i kemi rrafshu”- tha Ganijaj.

Ai shtoi se familjarët i kanë larguar ato varreza.

“Familajrët i kanë largu varrezat”- tha Ganijaj ndërsa Jeta Xharra i kthen “prej pronës së komunës?” e Ganijaj i përgjigjet “po”.

“Ajo rrafshimi i asaj parcele është bërë me buxhet familjar jo me të komunës”- tha Ganijaj.

E Jeta Xharra sërish i ktheu, “a ka hy bageri juaj privat në pronë publike?”.

“Qëllimi ynë ka qenë i mirë s’ka rëndësi a na thotë dikush faleminderit apo jo, qëllimi ka qenë me u shfrytëzu dhe me e mirëfilltë. Nuk kemi asnjë qëllim ndërtimi aty, vec thjeshtë me mbetë tokë bujqësore”- tha Ganijaj.

E kryetari Ruzhdi Shehu tha se tashmë janë lajmëruar organet e rendit.

“Jo, nuk kemi pasur as kërkesë as asgjë për atë çështje. Të gjitha masat janë marrë, janë lajmëru edhe organet e Ministrisë së Ambientit rasti është lajmëruar. Nuk mund të lëshohemi në gjykime pa pasur një verdikt tjetër”- tha kryetari Shehu.