54 persona të cilët gjatë ditës së djeshme u testuan për coronavirus dhe rezultuan negativ, janë liruar sot nga Qendra e Studentëve e cila është shndërruar në karantinë.

Ky grup i personave do të vazhdojë vetizolimin në shtëpitë e tyre.

Ky është grupi i katërt i të testuarve në katër ditët e fundit dhe prej 190 të gjithë rezultuan negativ.

Drejtori i Qendrës së Studentëve, Fatmir Sfishta, deklaroi se 230 persona gjithsej janë liruar pas testimit, derisa 400 persona janë duke qëndruar në karantinë.

“Fatmirësisht sot u liruan edhe 54 persona që kanë qëndruar për 14 ditë në karantinë. Të gjithë kanë rezultuar negativ pas testimit është një lajm i mirë. Numri i përgjithshëm që po qëndrojnë është 400, ndërsa 230 persona janë liruar”, tha Sfishta.

Ndërkaq sot pritet të testohen edhe rreth 70 persona të tjerë. Kështu kanë bërë të ditur për Telegrafin nga Ministria e Shëndetësisë.

Deri më tash në vendin tonë numri i të prekurëve ka arritur në 145, të shëruar janë 23 kurse 3 kanë humbur jetën.