Kryeministri i Kosovës, Albin Kurti, mori vendim për shfuqizimin e vendimit të Qeverisë së kaluar e cila rriti rrogat për 100%. Tani Kurti ia ka zvogëluar vetes rrogën për 1450 euro.
Ky shfuqizim i vendimit të ish-kryeministrit Haradinaj, bën që Albin Kurti të marrë vetëm 1500 euro pagë, shkruan Reporteri.net.
Me këtë, Kurti do të ketë pagë më të ulët se kryeministri Edi Rama, i cili paguhet 1700 euro, mirëpo sërish do të mbetet mbi tre kryeministrat e tjerë të rajonit.
Pagën më të ulët në rajon e ka kryeministrja serbe, Ana Brnabic, e cila paguhet vetëm 1000 euro. Paga e dytë më e ulët është e kryeministrit të Malit të Zi, Dusko Markovic, që merr 1130 euro. Ndërkaq, kryeministri në detyrë Zoran Zaev merr 200 euro më pak se Albin Kurti – 1300 euro.
Sidoqoftë, vendimi i Albin Kurti nuk preku vetëm atë por edhe 15 ministrat, të cilët do të marrin 730 euro më pak. Nga 2000 euro, ministrat do të paguhen 1270 euro.
