Kryeministri i Kosovës, Ramush Haradinaj, i shoqëruar nga ministri i Punëve të Brendshme, Bejtë Gashi, dhe u.d. i drejtorit të përgjithshëm të Policisë, Naim Rexha, kanë arritur në vendin ku mbrëmë dy pjesëtarë të Policisë ranë me veturën zyrtare nga rruga magjistrale Kaçanik-Hani i Elezit në rrjedhën e lumit Lepenc.
Ndonëse kërkimet janë zhvilluar mbrëmë dhe po vazhdojnë edhe sot, trupat e dy policëve nuk janë gjetur ende, ndërsa vetura në të cilën ishin ata është nxjerrë nga uji.
Në kërkim të trupave të dy policëve janë angazhuar njësi të Policsë, FSK’së, Zjarrfikësve e qytetarë vullnetarë.
Pasi ka arritur në vendin e ngjarjes, kryeministri Haradinaj tha se do ta kontaktojë edhe homologun e tij maqedonas, Zoran Zaev, që nëse lind nevoja t’i kërkojë leje për kërkime edhe në pjesën e lumit në Maqedoni.
Ai premtoi se Qeveria e Kosovës do t’u qëndrojë afër kolegëve të policëve të zhdukur si dhe familjeve.
“Shpresoj që do të na befasojë një lajm i mirë por po shihet një gjendje e rëndë”, theksoi ai./kallxo.com
