Krahu i Molliqajt’ me Grup të ri Parlamentar?
Krahu i të pakënaqurve’ të cilët kanë dhënë dorëheqje nga funksionet e tyre brenda Lëvizjes Vetëvendosje, kanë nisur diskutimet për krijim e një Grupi të ri Parlamentar.
Kështu ka bërë të ditur për “Gazeta Blic” një burim i afërt me ‘Krahun e të dorëhequrve’. Sipas këtij burimi, ky grup i deputetëve kanë filluar të zhvillojnë takime edhe në zyra të ndara prej Grupit Parlamentar të VV-së.
“Ka disa ditë që deputetët e dorëhequr nga Vetëvendosje po zhvillojnë takime të ndara me Grupin Parlamentar të VV-së. Ata po mblidhen në zyra të deputetit Dardan Molliqaj. Përveç kësaj, tashmë kanë nisur edhe diskutimet e para rreth mundësisë së krijimit të një Grupi të ri Parlamentar”, tha burimi i njëjtë për “Gazeta Blic”.
Deputetja e Kuvendit të Kosovës, që ende është pjesë e Grupit Parlamentar të VV-së Shqipe Pantina, nuk që në gjendje të mohoj por as pohoj, se kanë nisur diskutimet për formimin e një Grupi të ri Parlamentar, megjithëse u shpreh se në momentin që do të ketë diçka konkrete do të bëjnë ditur për opinonin.
“Në momentin që ne e marrim vendimin për të formuar një Grup Parlamentar ne do ta bëjmë publike, por për momentin asgjë konkrete nuk ka”, tha ajo për “Gazeta Blic”
Në fotografi: Shipe Pantina
Ndërkaq takimet në zyra të ndara, deputetja Pantina, i ka arsyetuar me atë se janë numer i madh i deputetëve dhe nuk mund të qëndrojnë në një zyrë.
“Si grup asnjëherë nuk ka zyre, Vetëvendosje e ka zyrën e shefit të grupit parlamentar të cilën e kemi përdor, e po ashtu është edhe zyrja e kryetarëve të komisionit, ne ato zyra i kemi shfrytëzuar dhe duke qenë se zyra është e vogël për t’i zënë të gjithë deputetët, disa prej tyre kanë përdorur edhe zyrat e tyre. Unë personalisht punët I kryj prej shpisë, në zyre asnjë herë nuk kam shkuar për të punuar, përveç ndonjë takim kur e kemi mbajtur”, tha ajo.
Më tej, e pyetur për votën e saj si deputete për marrëveshjen për demarkacion të kufirit ndërmjet Kosovës dhe Malit të Zi, Pantina tha se do të jetë kundër pavarësisht plotësim-ndryshimit të bërë nga Qeveria e Kosovës, pas ankes marrëveshjes së arritur ndërmjet dy shteteve në nivel presidentësh.
“Unë nuk e kam parë marrëveshjen e re, nuk e di çfarë ka në te. Por unë mendoj se ajo marrëveshje është e dëmshme dhe si të tillë nuk mund të votoj”, tha në fund ajo.
Zhvillimet e kohëve të fundit në Lëvizje Vetëvendosje, kanë bërë që të dalin në sipërfaqje ‘telashe’ të mëdha brënda këtij subjekti politik. Ato rezultuan edhe me dorëheqjen e dhjetëra zyrtarëve të lartë nga kjo parti, duke nisur nga ish-drejtuesi i saj Visar Ymeri, ish-anëtarja e kryesisë, Aida Dërguti, ish-sekretari Dardan Molliqaj e të tjerë.
Vetëvendosje formalisht është ndarë në dy tabore të cilat në opinion po njihen si “grupi i Molliqajt” dhe “grupi i Kurtit”./Gazeta Blic/
