Pronari i kompanisë NextSEO, Besart Bajrami, ka postuar në Facebook një fotografi të 16 anëtarëve të stafit dhe i ka falënderuar për mundin që kanë bërë gjatë vitit që po lëmë pas, duke i quajtur ata vajzat dhe djemtë më të mirë të këtij vendi.
“Sfidat gjatë këtij viti nuk kanë qenë edhe aq të lehta. Konkurrenca globale sa vjen e rritet dhe bëhet edhe më e fuqishme, por kur afër vetes ke një ekip me vajzat dhe djemtë më të mirë të këtij vendi, atëherë suksesi nuk mungon. E kur suksesi nuk mungon, atëherë nuk do të duhej të mungonte as mirënjohja dhe vlerësimi ndaj atyre që dhanë maksimumin e tyre për të shtyrë përpara projektet dhe produktet tona, që gjatë këtij vitit janë përdorur nga më shumë se 35 milion veta nga e gjithë bota,” ka shkruar ai.
E si shpërblim për punën e bërë, kompania ka vendosur t’i shpërblejë të gjithë të anëtarët e kompanisë me pagën e 13-të.
“Kjo ekipe fantastike meriton shumë më shumë se sa pagën e 13-të. 1 milion herë BRAVO dhe bëhuni gati se po na presin sfida edhe më të mëdha,” e ka përmbyllur Bajrami postimin e tij.
Në ndërkohë, në një postim në faqen e tyre zyrtare, kompania ka inkurajuar edhe kompanitë e tjera në Kosovë që të kontribuojnë në mirëqenien e punëtorëve dhe familjeve të tyre, por gjithashtu edhe në kthimin e besimit tek të rinjtë në kompanitë private dhe zgjuarjes së interesimit që të aftësohen për kërkesat e reja te tregut të punës.
