Qeveria e Kosovës i ka lënë në pozitat tepricë disa sekretarë të ministrive të ndryshme, të cilat janë prekur nga vendimi i koalicionit LVV-LDK, të cilët kishin vendosur të zvogëlojnë numrin e ministrive.

Kryeministri Kurti ka thënë se sekretarët e ministrive të prekur nga ky riorganizim do të kalojnë në listën tepricë dhe do të trajtohen sipas ligjeve në fuqi.

“Sekretarët e përgjithshëm nga ministritë e prekura nga riorganizimi sipas vendimit të datës 4 shkurt kalojnë në listën tepricë, sipas ligjeve në fuqi për shërbimin civil”, ka thënë Kurti.

Sekretarët e këtyre ministrive janë prekur sipas vendimit të sotëm të Qeverisë:

Ministria e Punëve të Jashtme dhe Diasporës,

Ministria e Arsimit, Shkencës, Teknologjisë dhe Inovacionit,

Ministria e Financave dhe Transfereve,

Ministria e Punëve të Brendshme dhe Administratës Publike,

Ministria e Ekonomisë, Punësimit, Tregtisë, Industrisë, Ndërmarrësisë dhe Investimeve Strategjike, dhe

Ministria e Infrastrukturës dhe Ambientit.

Kurti ka bërë të ditur se për sekretarët e përgjithshëm që janë prekur nga ky vendim do të shqyrtohet mundësia e ricaktimit në pozita ekuivalente.