Inspektorati Policor i Kosovës dje ka zhvilluar një operacion ku ka arrestuar dy zyrtarë në qendër të Prishtinës, shkruan Gazeta Metro.
Lavdim Osmani dhe rreshteri Lutfi Menxhiqi janë dy hetuesit e Krimeve Ekonomike të Policisë së Kosovës që janë arrestuar.
Osmani dhe Menxhiqi janë arrestuar pasi po dyshohen për veprën penale “marrje ryshfeti dhe keqpërdorim i autoritetit zyrtar”.
Mësohet se Osmanit i janë kapur në flagrancë mbi 1 mijë euro para të gatshme duke ju dorëzuar nga një person i cili ishte viktimë në këtë rast.
Dy hetuesit kanë qenë që një kohë të gjatë nën monitorim nga Inspektorati Policor i Kosovës për veprime të dyshimta.
Ky është njoftimi i IPK-së:
Inspektorati Policor i Kosovës kishte pranuar informacione përmes rrugëve operative se dy të dyshuar (zyrtarë policorë në Drejtorinë për hetimin e krimeve ekonomike dhe korrupsionit) mund të jenë të përfshirë në aktivitete të kundërligjshme.
Bazuar në këto informacione, hetuesit e IPK-së në koordinim me prokurorin kompetent filluan të ndërmerrnin veprime hetimore -operative duke përfshirë edhe masat e fshehta të hetimit ndaj dy zyrtarëve policorë dhe një qytetari.
Bazuar në dëshmitë dhe provat e mbledhura si dhe bazuar në urdhrin e Gjykatës Themelore në Prishtinë, mbrëmë në Prishtinë është realizuar operacioni i koduar me emrin: “Ryshfeti”, i cili rezultoi me arrestimin në flagrancë të një zyrtari policor dhe të një qytetari.
Zyrtari policor me inicialet L.O (zyrtar policor në Drejtorinë për hetimin e krimeve ekonomike dhe korrupsionit) është arrestuar nga hetuesit e IPK-së me dyshimin se ai kishte kryer veprën penale: “Marrje ryshfeti” dhe “Keqpërdorim i pozitës apo autoritetit zyrtar”.
Në vazhdën e veprimeve hetimore, operacioni “Ryshfeti”, ka vazhduar me bastisje në dy lokacione të ndryshme (një në Prishtinë dhe tjetri në Vushtrri) ku janë gjetur prova të konsiderueshme dhe është arrestuar edhe i dyshuari tjetër – zyrtari policor me inicialet L.M (rreshter policor në Drejtorinë për hetimin e krimeve ekonomike dhe korrupsionit).
Rreshteri policor është arrestuar me dyshimin se ai kishte kryer veprën penale: “Marrje ryshfeti”, “Keqpërdorim i pozitës apo autoritetit zyrtar” dhe “Mbajtje në pronësi, kontroll ose posedim të armëve”.
Të të arrestuarve në këtë rast nga Inspektorati Policor me vendim të prokurorit u është caktuar masa e ndalimit për 48 orë.
Veprimet e mëtejshme hetimore, lidhur me këtë rast do të vazhdojnë nga hetuesit e IPK-së në konsultim të vazhdueshëm me prokurorin përgjegjës./
