Ministri në detyrë i Shëndetësisë, Uran Ismaili përmes një letre zyrtare që pranoi nga homologu i tij gjerman, Jens Spahn, ka bërë të ditur për gatishmërinë e shtetit gjerman për ndihmën ndaj Kosovës në krijimin e sigurimeve shëndetësore që nga muaji janar.
Në komunikatën e lëshuar për media të ministrit Ismaili, thuhet se bashkëpunimi në mes Fondit të Sigurimit Shëndetësor të Kosovës dhe atij gjerman, AOK, do të nisë nga janari i vitit 2020, si rezultat konkret i një Memorandumi të bashkëpunimit që u nënshkrua në korrik të këtij viti.
Gjatë një konferencë për media të mbajtur sot nga Ministri i Shëndetësisë, Uran Ismaili dhe Ambasadori i Gjermanisë në Kosovë, Christian Heldt, Ismaili ka thënë se kjo marrëveshje e bashkëpunimit është një hap i madh drejt realizimit të sigurimeve shëndetësore.
‘Një ditë jashtëzakonisht e mirë dhe e rëndësishme për shëndetësinë kosovare. Tani po nisim bashkëpunimin konkret me Gjermaninë për të funksionalizuar Fondin e Sigurimit Shëndetësor, projekt ky që buron nga marrëveshja e nënshkruar në korrik me ministrin gjerman Spahn’, tha Ismaili.
Sipas tij, projekti do të ndahet në dy faza, e para nga të cilat do të fillojë në janar të vitit 2020. Ndërsa, ambasadori i Gjermanisë në Kosovë, Christian Heldt, theksoi se me anë të këtij hapi do të arrihet përparim thelbësor për qytetarët sa I përket kësaj fushe.
‘Jemi krenarë që pas punës intensive të të dy ministrive tona të shëndetësisë, janë harmonizuar hollësitë e bashkëpunimit tonë në ngritjen e Fondit të Sigurimit Shëndetësor të Kosovës. Ne jemi të bindur që me një përkushtim të madh të Qeverisë së Kosovës dhe punën e përbashkët të të gjithë akterëve të përfshirë, mund të arrihet përparim thelbësor për qytetarët’, ka përfunduar ai.
