Stadiumi nacional për Kombëtaren e Kosovës ishte vendosur që të ndërtohej në Drenas derisa në pushtet ishte qeveria ‘Haradinaj’, por me largimin e këtij të fundit nga ekzekutivi dhe me fitoren e opozitës në zgjedhjet parlamentare të 6 tetorit, mund të ketë ndryshime në këtë aspakt.

Lumir Abdixhiku, kandidat për deputet nga Lidhja Demokratike e Kosovës, e ka ‘nxehur’ debatin në një emision televiziv, duke thënë se stadiumi në fjalë do të ndërtohet në Bërnicë.

Derisa po zhvillohet ky debat, mendim për këtë çështje ka dhënë edhe trajneri i njohur kosovar Bylbyl Sokoli.

Sokoli mendon se duhet të invesohet tani për tani në ‘Fadil Vokrri’ dhe ‘Adem Jashari’.

“E kam thënë edhe më herët se Kosova do ta ketë problem ta mirëmbajë stadiumin në fjalë”, ka thënë Sokoli në ‘Dueli Sportiv’.

“E shihni atë që i ka ndodhur ‘Adem Jasharit’. Pra, më mirë është të investohet në ‘Fadil Vokrri’ dhe në ‘Adem Jashari”, vlerëson Sokoli.

“Mendoj se vlera prej 60 milionë euro për stadiumin e Kosovës të shpërndahet dhe të ndërtohen stadiumet në qytetet tjera kosovare për ekipet e Superligës”, ka thënë ish-trajneri i Prishtinës.

“Garderobat ku ne përgatitemi për ndeshje në Kosovë është në gjendje të mjerueshme”, shtoi ‘Profa’.