Kryeministri i Kosovës, Avdullah Hoti, ka thënë se pika 10 në marrëveshjen e Uashingtonit, që më vonë është larguar me kërkesë të Serbisë, nuk kishte të bënte me njohje reciproke.

Ai në emisionin Pressing në T7 tha se pika 10 kishte të bënte me ruajtjen e pakicave, të drejtave të minoriteteve dhe jo me njohjen reciproke.

Hoti ka folur edhe për njohjen nga Izraeli dhe hapjen e ambasadës së Kosovës në këtë vend.

“Ne kemi nevojë për njohje nga Izraeli, edhe nga vendet e tjera arabe”, është shprehur Hoti duke shtuar se nuk sheh asnjë problem në lidhje me këtë çështje.

Ai ndërkaq ka shprehur bindjen e tij se deri në fund të vitit mund të arrihet edhe marrëveshja finale Kosovë-Serbi.

“Jam i bindur se po shkojmë drejt asaj dhe duhet të punojmë së bashku”, ka thënë Hoti.

Sipas tij, marrëveshja e Uashingtonit për normalizim ekonomik me Serbinë është marrëveshja më historike e Kosovës e arritur pas asaj të shpalljes së pavarësisë.