Çështjet buxhetore, çështjet pronësore që ndërlidhen me tokat dhe ato që ndërlidhen me luftën kundër korrupsionit, janë temat kryesore për të cilat qeveria dhe komunat duhet bashkëpunuar.
Kështu ka thënë kryeministri Ramush Haradinaj, në fjalën e tij hyrëse, në takimin e parë me kryetarët e komunave në kuadër të “Forumi konsultativ qeveri – komuna”, i iniciuar nga vet kryeministri.
Ky takim është cilësuar si hap i parë drejt ndërtimit të platformës së përhershme të konsultimit, bashkëpunimit dhe bashkërendimit në forumin konsultativ qeveri – komuna.
Me këtë rast, kryeministri Haradinaj ka thënë se ky është një fillim i mirë i zhvillimit të një konsulte të vazhdueshme pra një Këshilli Konsultativ të vazhdueshëm qeveri-komuna, pasi kryetarët e komunave janë në komunikim direkt me qytetarët të cilët presin prej tyre.
Ai ka thënë se puna e kryetarëve të komunave është shumë e vështirë pasi që pritjet dhe nevojat janë të mëdha, ndërsa mundësitë janë të kufizuara.
Duke përmendur disa prej çështjeve dhe temave me të cilat ballafaqohen komunat e Kosovës, kryeministri Haradinaj ka pohuar se problemet janë të natyrave të ndryshme, duke filluar nga ato buxhetore për të cilat tha se duhet krijuar një marrëdhënie e re e tejkalimit të sfidave të rënda në disa komuna.
“Mundësitë që ekzistojnë duhet zbatuar dhe jo të humben për shkak të mungesës së komunikimit dhe bashkëpunimit ndërmjet nivelit nacional dhe atij lokal. Takimi i sotëm është një nismë e nevojshme për të vendosur këtë partneritet, në të mirë të qytetarëve”, është shprehur kryeministri Haradinaj, duke shtuar se komunat e kanë partnere Ministrinë e Administrimit të Pushtetit Lokal, por edhe Zyra e Kryeministrit dëshiron që të jetë e kyçur direkt në çështjet me të cilat ballafaqohen Komunat e Kosovës dhe t’ju dalë në ndihmë për zgjidhjen e tyre dhe për këtë arsye, Qeveria tashmë ka caktuar koordinatorin Besnik Tahiri që do të merret direkt me këto tema.
Kryeministri ka vlerësuar se dhënia e pronave në shfrytëzim për komunat është një tjetër hap drejt zhvillimit ekonomik.
Ai ka përmendur edhe luftën kundër korrupsionit, për të cilën tha se është interes i Kosovës dhe i bashkësisë ndërkombëtare, në procesin e Reformave Evropiane dhe çështjen më të ndjeshme të vendit tonë, liberalizimin e vizave për qytetarët tanë.
