Pushtimi i Ukrainës nga ana e Rusisë që po vazhdon prej ditësh, ka sjellë pasoja edhe në botën e sportit. Përveç sanksioneve ekonomike dhe politike, Rusisë i janë vendosur dhe ato sportive.

Formula 1 ka njoftuar këtë të enjte të 3 marsit se ka ndërprerë kontratën me organizatorët e Çmimit të Madh të Rusisë. Çmim që nuk do të mbahet as sezonin e ardhshëm.

“Ky nuk është një vendim i përkohshëm, por që do të prekë edhe vitet e ardhshme”, tha në një deklratë zyrtare Formula 1.

Megjithatë, FIA ka lejuar pilotët rusë të konkurrojnë rregullisht. Por ata do të jenë në gjendje ta bëjnë këtë nën flamurin e Federatës Ndërkombëtare.

Gjithashtu nuk përjashtohet që Haas të vendosë të ndërpresë përfundimisht marrëdhënien me shoferin e saj, Nikita Mazepin. Djalin e një prej oligarkëve rus më të afërt me Vladimir Putin-in, Dimitry Mazepin.

GP i Rusisë 2022 do të ishte i fundit që do të mbahej në Soçi përpara se të transferohej në Shën Petersburg nga viti 2023. Kontrata aktuale do të ishte e vlefshme deri në fund të sezonit 2025.

Vendimi i marrë do të çojë në mënyrë të pashmangshme në një ndryshim në kalendar.