Ministri në detyrë i Bujqësisë, Faton Peci aktualisht është duke u intervistuar lidhur me dyshimet për fabrikën për përpunimin e mbetjeve shtazore.
Kjo është konfirmuar nga Prokuroria Speciale e Republikës së Kosovës.
Nga kjo Prokurori konfirmuan gjatë ditës se bastisjet po kryhen në katër lokacione, mbi dyshimet për fabrikën për mbetje shtazore.
Ndërkaq, prokurori i rastit, Admir Shala, në një deklaratë për mediat ka thënë shkurt se Prokuroria Speciale ka nisur hetim lidhur me dhënien në shfrytëzim me qira të fabrikës për përpunimin e nënprodukteve shtazore.
Siç ka thënë ai bastisje po kryhen në Ministrinë e Bujqësisë, Agjencinë për Zhvillim të Bujqësisë, Agjencinë për Ushqim dhe Veterinari dhe në lokacionin e kompanisë përfituese të kontratës.
Peci sot u është shmangur gazetarëve, pas përfundimit të seancës së Kuvendit, në kohën kur pikërisht në Ministrinë e tij po kryheshim bastisjet.
Ai ka shfrytëzuar daljen e pasme të Kuvendit për t’u larguar me nxitim, duke iu shmangur kështu mediave.
