Realiteti i botës në ditët e sotme, është mjaft i komplikuar në krahasim me fëmijërinë tonë apo dhe me jetën e disa viteve më parë. Situata kritike që po kalon bota është e vështirë për t’u kuptuar nga moshat e vogla duke e bërë kështu thuajse te pamundur izolimin brenda katër mureve. Menaxhimi i stresit dhe i frikës është akoma më i vështirë për fëmijët duke patur mungesë në kuptimin e informacionit përkatës, kështu është i domosdoshëm aktiviteti gjatë ditës për përmirësimin e jetesës me lëvizje të kufizuar. Praktikimi i një instrumenti muzikor gjatë momenteve të vështira që po kalojmë, ndikon në mënyrë direkte në çlirimin e stresit jo vetëm tek fëmijët por tek e gjithë familja. Muzika prej vitesh është përdorur dhe nga mjekësia për të ulur ankthin dhe frikën. Për të shkuar dhe më tej, një studim zbuloi se muzika ndikonte në rritje të lgA-së, një antitrup i rëndësishëm për linjën e parë të sistemit tonë imunitar mbrojtës kundër sëmundjeve.
Mirëpo praktimi i instrumentave muzikor rekomandohet të shoqërojë në mënyrë të vazhdueshme rritjen e fëmijës duke qenë kështu ndikues mjaft i rëndësishëm në formimin kompleks individual.
Zhvillimi i teknologjisë përpos të mirave përkatëse, bën të harrohen gjithnjë e më tepër lojrat në natyrë e aktivitetet fizike. Lojrat elektronike dhe aplikacionet e celularëve të cilët pretendojnë se zhvillojnë trurin e kujtesën, nuk rezultojnë të kenë efekte pozitive përkundrazi, kemi të bëjmë me ulje të dukshme të koncentrimit, probleme sociale, probleme fizike, etj.
Studime të publikuara gjatë viteve konfirmojnë se 50% e inteligjencës së fëmijëve është e lindur duke qenë përgjegjëse për të trashëgimia genetike por 50% -shi tjetër ndikohet direkt nga zhvillimi e stimulimi që merr gjatë jetës. Në këtë kontekst është vërtetuar se leksionet në muzikë stimulojnë më tepër zhvillimin intelektual tek fëmijët sesa teknologjia.
Mësimi i një instrumenti muzikor i rrit fëmijëve në mënyrë të veçantë anën krijuese e memorien afatgjatë duke qenë kështu një stërvitës i mirë i trurit por dhe i anës sentimantale të fëmijës. Është vërtetuar gjithashtu se ka patur efekte pozitive në fëmijë asocial apo dhe me spektër autik, duke qenë kështu një mënyrë shumë e mirë për të shprehur emocionet si dhe për të përjetuar ndjenjën e suksesit e krenarisë në arritjen e përmbushjes së detyrave.
Zhvillimi i trurit të fëmijës në aspektin praktit, ka të bëjë me koordinimin e disa aktiviteteve ndërvepruese njëherësh siç është leximi i notave të dy pentagrameve nëpërmjet syve; sinjal i cili i shkon trurit në një kohë shumë të shpejtë për të vënë në lëvizje të dyja duart në pozicione të ndryshme njëkohësisht. Kjo gjë bën që fëmija të vërë në punë njëherësh trurin, duart e sytë me një shpejtësi e përqëndrim maksimal, gjë e cila nuk realizohet dot nga fëmijë që nuk praktikojnë një instrument muzikor.
Të mësosh gjuhën e muzikës është si të mësosh një gjuhë të re të vështirë madje të ndërthurur me matematikën… Të gjithë e dimë se sa e vështirë do ishte kjo gjë! Leximi i notave në muzikë bëhet nëpërmjet pentagramit ku caktohet se cila nota është, se sa gjatë apo shkurt do luajtur në instrument, se çfarë kërkon kompozitori të shprehë përmes shenjave të ngjyrimit muzikal duke i shkruar kështu në vija e forma të ndryshme, duke shtuar gjatë pjesë kohën e simbole të tjera të nevojshme. Në këtë kontekst është thënë përherë se muzika ka një lidhje të fortë ndërvepruese me matematikën duke mësuar nëpërmjet figurave ritmike si të përpjestojnë numrat apo të ndajnë masat. Kjo shpjegon dhe arsyen përse Einstein e ka dashur përherë muzikën e violinën e tij duke u shprehur se ka menduar për matematikën e shkencën gjithmonë nëpërmjet muzikës.
Të mësosh një instrument muzikor nuk do të thotë vetëm të marrësh mësime muzike. Instrumentistët kanë një jetë të pasur artistike duke qenë pjesë e koncerteve të ndryshme, organizimeve artistike në vend e festave të përvitshme duke i dhënë kështu fëmijëve kënaqësi të mëdha interpretative përballë publikut e duke i zhvilluar vetëbesimin. Kjo gjë gjithashtu i bën të bashkëveprojnë me moshatarë të tjerë, të krijojnë shoqëri si dhe të zhvillojnë sensin e punës në grup.
Mbi të gjitha vlen për t’u përmendur fakti se përveç zhvillimit të inteligjencës, duke praktikuar një instrument muzikor fëmija përfiton një terapi mjaft pozitive duke rritur dukshëm kreativitetin e duke shprehur kështu veten nëpërmjet muzikë