Sekretari i AAK-së, Blerim Kuçi, është shprehur i zhgënjyer që sot nuk kaloi Demarkacioni në Kuvendin e Kosovës.
Ai tha se heqja e raportit Bulliqi nga projektligji e zbeh atë dhe kjo do të ishte e papranueshme për AAK-në, pasi që sipas tij, ky ka qenë material bazë për deklaratën e presidenteve Thaçi-Vujanoviq.
“Heqja e raportit Bulliqi, ia humbë vlerën deklaratës së presidentëve”, tha Kuçi për televizionin publik.
Megjithatë ai u shpreh optimist se nesër në Kuvend do të jenë votat e mjaftueshme për të kaluar demarkacioni. Sekretari i AAK-së, duke komentuar deklarimet e Listës Serbe, tha se kjo është një temë tjetër dhe sipas tij, nëse ata nuk e votojnë Demarkacionin, atëherë duhet shikuar edhe Kushtetutën, për të bërë ndryshime, pasi që sipas tij, Lista Serbe nuk e ka luksin që të kushtëzojë procese në Kosovë.
Sido që të shkojë procesi, Kuçi tha se nëse legjislativi nuk e kalon Demarkacionin, nuk e ka asnjë arsye të vazhdojë punën, dhe parlamenti duhet të shpërndahet.
Për Kuçin “edhe rënia e Qeverisë për shkak të Demarkacionit nuk do të ishte kiamet”.
