Kryeministri në detyrë Ramush Haradinaj është në pritje të thirrjes së presidentit Hashim Thaçi për konsultat me partitë politike për datën e zgjedhjeve.
Por, për ditën e nesërme ai ka paralajmëruar një takim konsultues me të parin e PDK-së Kadri Veseli dhe atë të NISMA, Fatmir Limaj.Në takim, siç tha ai, do të bisedojnë për situatën politike, teksa u shpreh me ironi se do të diskutojnë edhe për “ngrohjen globale”.
Haradinaj tha se nuk ka asnjë interes që të kthehet në zyrat e të parit të Qeverisë, pas dorëheqjes, por shkon pasi mban përgjegjësi për t’iu shmangur vakumit institucional.
“Si kryetar i Qeverisë, nuk kam interes që pas dorëheqjes të vij në zyrën e Qeverisë, as nuk vij se është më fllad, por vij se mbaj përgjegjësi. Derisa dikush nuk e merr këtë punë, për të mos pasur vakum qeverisës”, tha ai.
