Aktorja e Game of Thrones, Esmé Bianco ka paditur këngëtarin Marilyn Manson për sulm seksual. Padia pretendon se Manson e ka detyruar aktoren britanike për të kryer marrëdhënie seksuale, përmes drogës, forcës dhe kërcënimeve. Aktorja gjithashtu pretendon se këngëtari dhe menaxheri i tij e joshën atë të vinte nga Londra në SH.B.A. me premtime pune boshe.
Artisti ka hedhur poshtë akuzat e shumta për abuzim kundër tij, duke i cilësuar si “shtrembërime të tmerrshme të realitetit”.
Në shkurt, aktorja e Westworld Evan Rachel Wood e akuzoi publikisht Manson për abuzim në familje. Që nga ajo kohë, më shumë se 12 gra të tjera kanë dalë me akuza të ngjashme.
Në një postim në Instagram më 1 shkurt, Manson shkroi:
“Natyrisht, arti im dhe jeta ime kanë qenë prej kohësh magnet për polemikë, por këto pretendime të fundit rreth meje janë shtrembërime të tmerrshme të realitetit. Marrëdhëniet e mia intime kanë qenë gjithnjë konsensuale me partnerët. Pavarësisht se si, dhe pse, të tjerët tani po zgjedhin të keqinterpretojnë të kaluarën, kjo është e vërteta.”
Bianco, e cila luajti Ros në Game of Thrones, ishte ndër disa gra që dëshmuan kundër Manson në fillim të këtij viti. Bianco thotë se ajo u takua me rokerin në vitin 2005. Sipas padisë, në shkurt të 2009-ës, ai e ftoi atë në Los Angeles për të filmuar një video muzikore. Por kur Bianco mbërriti ajo tha se në shtëpinë e tij nuk kishte asnjë ekip xhirimi. Bianco pretendon se ajo ishte privuar nga ushqimi dhe gjumi dhe iu dha drogë dhe alkool gjatë qëndrimit të saj 4-ditor.
Padia thotë se ata filluan një marrëdhënie seksuale konsensuale në maj të 2009-ës dhe mbajtën një marrëdhënie në distancë deri në vitin 2011. Në ankesën e saj, Bianco thotë se Manson e detyroi atë për marrëdhënie seksuale shpesh të dhunshme dhe degraduese, ndonjëherë edhe kur ajo ishte pa ndjenja ose ndryshe nuk ishte në gjendje të jepte pëlqimin.
Ajo pretendon se Manson kreu veprime të shumta seksuale pa pëlqimin e saj në vitin 2011 dhe e përdhunoi atë në maj të atij viti.
