Një hulumtim dyvjeçar i emisionit “Kallxo Përnime” ka zbardhur një aferë në të cilën dyshohet se u dhanë 150 mijë euro për të ndikuar në kryerjen e disa lëndëve në gjykatat e Kosovës.
Mbi 2 orë audio dhe video-incizime nga takimet tregojnë se si njerëzit e politikës dhe ata të drejtësisë bëhen bashkë për të ndikuar në vendimet e gjyqtarëve.
Gjatë këtyre takimeve Haxhi Dërguti, ish-kryeprokurori i Apelit, premton se do t’i takojë e të flasë me gjyqtarët që vendimet e tyre të jenë në favor të biznesmenit Sali Dakaj.
I pyetur nga mediumi, Haxhi Derguti ka pranuar se ka takuar një nga gjyqtarët e përmendur në incizimet e bëra në muhabetet mes tij dhe biznesmenit Sali Dakaj. Në anën tjetër gjyqtarët kanë mohuar të jenë takuar me Haxhi Dërgutin për të diskuar për lëndët.
Sali Dakaj ka rrëfyer se i janë kërkuar 300 mijë euro që lënda e një përmbarimi të një borxhi të kthehet në favorin e tij.
Ai ka treguar se i ka marrë 150 mijë euro borxh për t’ia dhënë biznesmenit Hasan Morina.
Takimi me Hasan Morinën ishte ndërmjetësuar nga Liridon Fandaj, ish-shef i asamblistëve të Lëvizjes Vetëvendosje në Suharekë.
Ish-kryeprokurori i Apelit, Haxhi Dërguti, ka mohuar të ketë marrë para por nuk e ka mohuar se ka takuar dhe i ka thënë që ta ketë parasysh për ta shpejtuar lëndën e Dakajt.
Dërguti gjithashtu ka mohuar edhe faktet që dëgjohen duke i thëna Sali Dakajt në video-incizimet.
“Rriji gati këtij procesi, gjej njerëz, jep pare se përndryshe kjo punë ndryshe nuk kryhet”.
Kjo fjali dhe shumë premtime të tjera janë dëgjuar duke i thënë ish-kryeprokurori i Apelit, Haxhi Dërguti, biznesmenit Sali Dakajt.
Pas publikimit të një hulumtimi në të cilën dyshohet se u dhanë 150 mijë euro për të ndikuar në kryerjen e disa lëndëve në gjykatat e Kosovës, ka reaguar ministrja e Drejtësisë, Albulena Haxhiu.
Në një shkrim në llogarinë e saj në Facebook, Haxhiu ka thënë se Haxhi Dërguti ish kryeprokuror i Apelit dhe gjyqtarët por edhe secili person i përfshirë në skandalin në fjalë duhet të arrestohen menjëherë.
“Fenomenet që kanë qenë të njohura prej kohësh, sot po i shohim e dëgjojmë”.
Sipas ministres, pos Dërgutit, brenda sistemit të Drejtësisë, ka shumë persona të cilët mbyllin lëndë me duke marrë ryshfet.
“Haxhi Dërguti jo vetëm për këtë rast por edhe për shumë raste tjera. Pavarësisht që sot është avokat, ndikimet e paligjshme të tij jam e bindur që vazhdojnë ende për shkak të shumë njerëzve që i ka brenda sistemit të drejtësisë që hapin e mbyllin lëndë me para”, u shpreh ajo.
Haxhiu i ka bërë thirrje grupeve parlamentare në Kuvend nga radhët e opozitës që t’i japin mbështetje reformës në drejtësi.
“Sidomos, në rrethanat kur sistemi nuk është në shërbim të qytetarëve, qytetarët që i qesin sheshit pazaret e skandalet janë shpresa që e keqja mund të luftohet prandaj inkurajoj të gjithë që të ndjekin shembullin e qytetarëve të guximshëm dhe në anën tjetër bëj thirrje grupeve parlamentare në Kuvend nga radhët e opozitës që t’i japin mbështetje reformës në drejtësi e cila me padurim po pritet nga qytetarët”, ka shkruar Haxhiu.
