Kryetari i LDK-së, Lumir Abdixhiku, ka reaguar pas paralajmërimeve të Qeverisë për shtrenjtimin e tarifave të energjisë elektrike.
Abdixhiku e ka quajtur paaftësi të Qeverisë reagimin e vonshëm në lidhje me krizën në energji, ndërsa ka thënë se fillimisht ekezkutivi thoshte se nuk ka krizë.
Ai ka përmendur ndarjen e 100 milionë eurove për importin e energjisë, ndërsa ka thënë se edhe pas milionave të ndara, Qeveria nuk ka arritur të bëjë zgjidhje.
Në lidhje me paralajmërimet e rritjes së çmimit të energjisë elektrike, kreu i LDK-së e ka kundërshtuar duke quajtur si “paralajmërim skandaloz”, ndërsa ka thënë se ky është shtrenjëtimi më i lartë i energjisë elektrike në gjithë historinë e Kosovës dhe se do kundërshtojnë edhe në seancën e se enjtes të Kuvendit të Kosovës, transmeton Gazeta Online Reporteri.net.
Shkrimi i plotë:
ÇMIMI I PAAFTËSISË
Në fillim thanë s’kemi krizë. Më pas i dhanë 100 milionë euro për blerje të energjisë. Para të buxhetit të shtetit që mund t’i përdornim shumë më mirë. Tani kemi edhe krizë, edhe 100 milionë më pak, edhe shtrenjëtim të energjisë.
Papërgjegjësia kushton. Reagimi i vonshëm kushton. Dhe dy javë nga sot, këtë padituri e papërgjegjësi të Qeverisë, përtej 100 milionëshit të djegur tashmë, do ta paguajnë më shumë se gjysma e familjeve kosovare në faturat e tyre mujore të energjisë. Për çdo muaj në vijim, një e treta e pagës mesatare në Kosovë do të shkojë për energji. Tani kjo është krizë.
Ky është shtrenjëtimi më i lartë i energjisë elektrike në gjithë historinë e Kosovës. Përveç se po paguajmë shtrenjtë, përveç se familjet po diskriminohen pa ndonjë kriter logjik, nuk ka as plan e as ide për një zhvillim strategjik afatgjatē energjetik. Vendime të vonshme dhe zgjidhje skandaloze – ky është epilogu i paaftësisë. Jam i bindur, natyrisht, se edhe këtë herë do të gjejnë një fajtor diku në 20 vjet. Por s’ka gjë që mund ta mbulojë këtë jokompetencë. S’ka gjë që mbulon barrën financiare që po ja vënë familjeve kosovare.
Prandaj, paralajmërimin e sotëm skandaloz të Qeverisë, LDK do ta kundërshtojë këtë të enjte në seancë parlamentare. Presim që këtë vendim ta kundërshtojë çdo deputet i përgjegjshëm në Kuvend. Përtej kësaj, një dëm të tillë s’mund ta lejojmë e trajtojmë pa përgjegjësi.
